गेटामा विश्वविद्यालय स्थापनाको माग गर्दै छलिया नाँचसहित प्रदर्शन

कैलाली । कैलालीको गेटामा विश्वविद्यालय स्थापनाको माग गर्दै बाजागाजासहित प्रदर्शन गरिएको छ । बिहीबार गेटामा सहिद दशरथचन्द राष्ट्रिय स्वास्थ्य विज्ञान विश्वविद्यालय स्थापनार्थ गठित संघर्ष समितिले छलिया नाचसहित प्रदर्शन गरेको हो ।

सरकारले आगामी आर्थिक वर्षको बजेटमार्फत गेटामा सहिद दशरथचन्द राष्ट्रिय स्वास्थ्य विज्ञान प्रतिष्ठान स्थापना गर्ने घोषणा गरेसँगै आन्दोलित बनेका सुदूरपश्चिमेलीवासीले उक्त निर्णय खारेज गर्दै विश्वविद्यालय स्थापना गर्न माग गरिरहेका छन् । त्यसै अन्तर्गत संघर्ष समितिले बिहीबार अत्तरिया बजार पूर्ण रुपमा बन्द गराएको थियो । बिहान ८ बजेदेखि साँझ ६ बजेसम्म बजार बन्द गरेसँगै संघर्ष समितिले बाजागाजासहित अत्तरिया बजारदेखि गेटासम्म र्याली निकालेको हो ।

यसअघि सरकारले २०७९ माघ २९ गते मन्त्रिपरिषद र जेठ ५ गते नीति तथा कार्यक्रममा गेटामा शहीद दशरथ चन्द राष्ट्रिय स्वास्थ्य विज्ञान विश्वविद्यालय सञ्चालन हुने भनिएको थियो । तर, बजेटमार्फत गेटामा विश्वविद्यालय नभएर प्रतिष्ठान स्थापना गर्ने घोषणा भएपछि मन्त्रिपरिषद् निर्णय कार्यान्वय गर्न माग गरिएको छ ।

शान्तीपूर्ण रुपमा आन्दोलन गरे पनि सरकारले यसतर्फ ध्यान नदिए आन्दोलन थप चर्काउने संघर्ष समितिले चेतावनी दिएको छ ।