जिल्ला अस्पताल बैतडी स्तरोन्नतीको माग गर्दै सुदूरपश्चिमका मुख्यमन्त्रीलाई बुझाए ज्ञापन पत्र

  धनगढी : जिल्ला अस्पताल बैतडी स्तरोन्नतीको माग गर्दै सुदूरपश्चिमका मुख्यमन्त्रीलाई ज्ञापन पत्र बुझाइएको छ । प्रमुख जिल्ला अधिकारी भीमकान्त शर्मामार्फत मुख्यमन्त्री कमलबहादुर शाहलाई बुधबार पाँच बुँदे ज्ञापन पत्र बुझाएको सामाजिक अगुवा महेशदत्त भट्टले बताए ।

५० वर्ष पहिले स्थापना भएको अस्पतालले अहिलेसम्म विशेषज्ञ सेवा दिन नसकेको स्मरण गराउँदै अस्पताल स्तरोन्नतीको माग गरिएको उनले बताए । जिल्ला अस्पतालमा विशेषज्ञ सेवा नहुँदा र दरबन्दी अनुसारका चिकित्सक नहुँदा नागरिकले सीमावर्ती भारतीय क्षेत्रमा गएर उपचार गराउनुपर्ने बाध्यता रहीआएको बैतडी उद्योग वाणिज्य संघका उपाध्यक्ष खीमानन्द भट्टले बताए ।

अस्पतालसँग भौतिक संरचना भएपनि दरबन्दी अनुसार चिकित्सक अहिलेसम्म पदपूर्ती हुन सकेको छैन । सुदूरपश्चिम प्रदेशमा नयाँ सरकार बनेपछि बजेट निर्माणको काम भइरहेकाले अस्पतालको समस्या समाधानका लागि पहल होस् अभियान नै सञ्चालन गरिएको भट्टले बताए ।