कैलालीको टीकापुरस्थित केदारेश्वर आधारभूत विद्यालयमा तोडफोड

धनगढी, २१ साउन । कैलालीको एक विद्यालयमा तोडफोड गरिएको छ । शनिवार राति जिल्लाको टीकापुर नगरपालिका–३ शंकरपुरमा रहेको केदारेश्वर आधारभूत विद्यालयमा तोडफोड भएको हो ।

अज्ञात समूहले तीन वटा कक्षाकोठाको ढोका फोडेर डेस्क बेन्च तोडफोड गरेको विद्यालयका प्रधानाध्यापक बद्री भट्टराईले जानकारी दिएका छन् । उनका अनुसार तीन कोठाका १० थान डेस्क–बेच्न र झ्याल–ढोकामा तोडफोड गरिएको छ ।

तोडफोडबाट करिब ३० हजार बराबरको क्षति भएको प्रधानाध्यापक भट्टराईले बताए । उनले विद्यालयमा तोडफोड गर्ने दोषीमाथी कडा कारबाही हुनुपर्ने माग राखे ।

सो विद्यालयमा यस्ता घटनाहरु पटकपटक दोहोरिने गरेको समेत उनको भनाई छ । उनले आफु प्रधानाध्यापक भएर आइसकेपछि चौथो पटक विद्यालयमा तोडफोड भैसकेको उनले बताए ।