धनगढी । धनगढी पछिल्लो समय सुन्दरसँगै व्यवस्थित पनि बन्दैछ । अझ धनगढीको नेतृत्वमा स्वतन्त्र व्यक्ति आएसँगै धनगढीको मुहार दिन दुई गुणा, रात चौगुणाले फेरिएको छ । तथापि देखिएका तर देखाउन नखोजिएका थुप्रै समस्या धनगढीमा छन् । जसको समाधान न स्थानीय सरकार खोज्छ, न सम्बन्धित निकाय खोज्छन्, न त खोज्ने प्रयास नै गर्छन् । जसमध्येको एक प्रमुख समस्या हो, ट्राफिक व्यवस्थापन ।
चौडा सडक, फराकिला सडकपेटी र व्यवस्थित नाला बनेसँगै धेरैलाई लागेको छ, धनगढीको समस्या पूर्ण रुपमा समाधान भयो । हिजो हिँड्दा खाल्डैखाल्डा हुने सडक पिच बनेपछि धेरैले सोचेका छन्, अब समस्या सकिए । तर, फराकिला सडक र चौडा सडकपेटी बने पनि धनगढीमा ट्राफिक व्यवस्थापन मुख्य चुनौतीका रुपमा स्थापित भएको छ । यसै पनि धनगढीमा टफिक नियम पालना गराउनु विगत देखि नै ट्राफिक प्रहरीका लागि फलामको चिउरा चपाउनुसरह थियो र छ । तर अहिले ट्राफिक व्यवस्थापनमा ट्राफिक प्रहरीले झनै कम चासो दिन थालेपछि समस्या झनै बढेको स्थानीयहरुले गुनासो गरेका छन् ।
अहिले धनगढीका मुख्य तथा सहायक सडकमा दिनहूँ सयौँको संख्यामा सवारीसाधन गुड्छन, हजारौँको आवतजावत हुन्छ । तर अत्यन्तै व्यस्त हुने धनगढीका यिनै सडकमा ट्राफिक प्रहरीको उपस्थिति र व्यवस्थापन भने प्राय शून्य छ । यही कारण धनगढीमा ट्राफिक व्यस्थापनसँगै दुर्घटनाको जोखिम पनि उच्च रहेको स्थानीयहरुले बताउने गरेका छन ।
तर यता जिल्ला ट्राफिक प्रहरी कार्यालय कैलालीका प्रमुख तथा प्रहरी निरीक्षक चक्र बहादुर देउवाले अत्याधिक गर्मी र धुँवा, धुलोका कारण दिउँसोको समयमा ट्राफिक प्रहरी शितल भएको ठाउँमा बस्ने भएकाले सडकमा नदेखिएको हुनसक्ने तर्क गरेका छन् ।
‘धनगढीमा ट्राफिक प्रहरीको ड्युटिका लागि निश्चित ठाउँ तोकिएको छ । ट्राफिक प्रहरी ट्राफिक चौराह, एलएन चोक, सहिद गेट र बसपार्क चोकमा हुन्छन’, उनले भने, तर गर्मी र धुलोका कारण ट्राफिक प्रहरी शितल ठाउँमा बसेका हुनसक्छन ।’ तर हामी ती क्षेत्रमा पुग्दा त्यहाँ ट्राफिक प्रहरीको उपस्थिति कतै थिएन ।
त्यस्तै ट्राफिक नियमबारे आफूहारुले समय समयमा ट्राफिक सचेतना कार्यक्रम आयोजना गर्ने गरेको बताउंदै ट्राफिक प्रहरी इन्स्पेक्टर देउवाले अपेक्षा गरेजतिमा ट्राफिक सचेतना पुराउन नसकिएको स्वीकारेका छन् । उनले त्यही कारण धनगढीमा ट्राफिक नियमको सहि सदुपयोग नभएको बताएका छन ।
अर्कोतर्फ सहर व्यवस्थित बनिरहँदा ट्राफिक व्यवस्थापन भने चुस्त र व्यवस्थित नहुँदा व्यवस्थित सहरको मर्म नै मर्ने चिन्ता बढेको स्थानीयहरुले बताएका छन् । हुन पनि हो, जबसम्म सहरको ट्राफिक चेतना र व्यवस्थापन व्यवस्थित हुँदैन, तबसम्म व्यवस्थित सहरको परिकल्पना गर्नु व्यर्थ हो । सम्बन्धित निकायको बेलैमा ध्यान जाओस् ।
प्रतिक्रिया दनुहोस्