धनगढी : कैलालीको गोदावरी नगरपालिका–११ को नायल कृषि सहकारी संस्थाले दुध उत्पादन, भण्डार र बिक्री गर्दै आएको छ।
सहकारीमा दुध वितरण शाखा स्थापना गरिएको छ। सहकारीले गोदावरी नगरपालिका–१०, ११ र १२ का किसानहरूको घर–घरबाट दुध सङ्कलन गर्दै आएको छ। गोदावरी–१ अत्तरियामा समेत शनिवार मात्र नयाँ दुध शाखा विस्तार गरिएको छ। नायल कृषि सहकारी संस्थाका अध्यक्ष पदमराज गिरीले दैनिक ६ सय लिटर दुध सङ्कलन गर्दै आएको बताए। उनले भने, ’चौथो वर्षमा हामी छौ। ६ सय लिटर बढी दुध उत्पादन गर्दै आएका छौ। चिसोमा घटेको छ।’
२०७८ सालमा स्थापना भएको सहकारीले दैनिक ३३५ दुध उत्पादक किसानहरूको घरबाट ६ सय लिटर दुध सङ्कलन गर्दै आएको छ। एक गाडी र मोटरसाइकलमार्फत दुध चिस्यान केन्द्रमा आउने गरेको छ। सहकारीले गोदावरी–११ मा चिस्यान केन्द्र स्थापना गरेको हो। प्रदेश सरकार मातहतको पशु सेवा निर्देशनालयको सहकार्यमा अत्तरियामा दुध एटिएमको सुविधासमेत विस्तारको तयारी गरिएको छ। चिस्यान केन्द्रमा आएको दुध बिक्री गर्दै आएको सहकारीले अत्तरियामा २४ सै घण्टा दुध एटीएम सञ्चालनको तयारी गरेको हो। ‘प्रस्तावना पेस गरेका छौ। हुन्छ भन्नु भएको छ। दुध एटीएम सञ्चालन गर्ने भनेको हो,’ उनले भने।
गोदावरी नगरपालिका– ११ मा रहेको नायल कृषि सहकारी संस्थाले वार्षिक एक करोडसम्मको दुध बिक्री गर्दै आएको छ। गोदावरी नगरपालिकाका सबै वडामा दुध सङ्कलनको क्षमता विस्तारको तयारी गरिएको छ। सहकारीले ३५ लाखसम्मको सम्पाती चार वर्षमा नै जोडेको छ। सहकारीले दुध बिक्रबाट सम्पाती जोडेको हो। किसानहरूको सङ्ख्यासमेत वृद्धि हुदै गएकाले आम्दानीसमेत बढ्ने तर्क गरिएको छ। गिरीले भने, ‘एक गाडी छ। मोटरसाइकल छ। चालकहरू छन। ओलानीमा चिस्यान केन्द्र छ। अत्तरिया, धनगढीमा दुध वितरण गर्दै आएका छौ। डिडिसीलाई पनि दिने गरेका छौ।’
गोदावरी नगरपालिकाका १२ वटै वडाका दुध उत्पादक किसानहरूको घरबाट दुध सङ्कलन गर्ने लक्ष्य सहकारीको छ। सहकारीको सेवा विस्तारसँग कर्मचारी र आम्दानीसमेत वृद्धि हुने छ।
प्रतिक्रिया दनुहोस्