कोहलपुरमा प्रहरी कल्याण कोषको पेट्रोल पम्प सञ्चालनमा

बाँके : नेपाल प्रहरीले बाँकेको कोहलपुरमा पेट्रोल पम्प सञ्चालनमा ल्याएको छ। प्रहरी कल्याण कोषबाट पेट्रोल पम्प निर्माण गरिएको हो। प्रहरी महानिरीक्षक वसन्तबहादुर कुँवरले नवनिर्मित प्रहरी कल्याण कोष पेट्रोल पम्पको सोमबार उद्घाटन गरेका छन्।

कार्यक्रममा प्रहरी महानिरीक्षक कुँवरले प्रहरी पेट्रोल पम्प नेपाल प्रहरीको मात्र नभई सबैको साझा सम्पत्ति भएको हुँदा यसले नेपाल प्रहरी तथा आमनागरिकका सवारीसाधनसमेतलाई सरल र सहज रूपमा इन्धन आपूर्ति गराउनुका साथै विशेष परस्थितिमा समेत इन्धनको आवश्यकता पूर्ति गर्न सहज हुने विश्वास व्यक्त गरे।

नेपाल प्रहरी शान्ति सुरक्षाको सन्दर्भमा आमजनता केन्द्रित सेवा प्रदान गर्ने राज्यको विश्वासिलो र भरोसायोग्य संगठनको रूपमा रहेको बताउँदै उनले आमनागरिकमा निष्पक्ष सेवा प्रवाह र प्रदेशको समग्र शान्ति सुव्यवस्था कायम राख्न समुदायसँग सहकार्य गरी योजनाबद्ध ढंगबाट प्रभावकारी प्रहरी परिचालन गर्न प्रहरी अधिकारीलाई निर्देशन दिए।

नेपाल प्रहरी कल्याण कोषको  ६ करोड २७ लाख ६४ हजार ७ सय रुपैयाँको लागतमा उक्त पेट्रोल पम्प तथा पूर्वाधारहरूको निर्माण कार्य सम्पन्न गरिएको प्रहरी प्रधान कार्यालयले जनाएको छ।