धनगढी : वर्षभरिको मिहिनेत गरेर खेतमा पाकेको बाली भित्र्याउने बेला भएको बेमौसमी वर्षाले धनगढीसहित सुदूरपश्चिमका किसानहरूलाई ठूलो चिन्तामा पारेको छ। धान काट्ने र थन्काउने चटारोका बीच अचानक परेको पानीले किसानहरूको मुखमा आइसकेको घाँस खोसिएको अवस्था सिर्जना भएको छ।
पछिल्ला केही दिनयता यहाँको मौसममा आएको फेरबदलसँगै भएको वर्षाका कारण विशेष गरी धान बालीमा व्यापक क्षति पुग्ने जोखिम बढेको छ। खेतमा पाकेर पहेंला भएका धानका बालाहरू पानीले भिजाएपछि काट्न तयार भएको बाली ढल्ने र खेतमै उम्रिने वा कुहिने डरले किसानहरू पिरोलिएका छन्।
“वर्षभरि खाने अन्न भित्र्याउने बेला आकाश गर्जेर पानी पर्दा हाम्रो उठिवास लाग्ने भयो,” धनगढीका एक स्थानीय किसानले दुखेसो पोखे, “पसिना बगाएर पालेको अन्न जोगाउन अब कसरी सम्भव होला भन्ने चिन्ताले सताएको छ।”
धानबाली भित्र्याउने मुख्य मौसममा भएको यो वर्षाले किसानको श्रम र लगानीमा ठूलो धक्का पुर्याएको छ। समयमै भित्र्याउन नपाएमा उत्पादनमा भारी गिरावट आउने र यसले खाद्य संकटसमेत निम्त्याउन सक्ने चिन्ता कृषि विज्ञहरूले व्यक्त गरेका छन्। प्राकृतिक विपद् र मौसमको यो मारले सुदूरपश्चिमका अन्नदातालाई फेरि एकपटक ठूलो पीडामा पारेको छ।
प्रतिक्रिया दिनुहोस्