बेलुन विष्फोटमा परी घाइते भएका अर्थमन्त्री र मेयरको सघन कक्षमा उपचार हुँदै !

पोखरा : शनिवार पोखरा भ्रमण वर्ष २०२५ को उद्घाटनका क्रममा बेलुन विष्फोटमा परी संघीय सरकारका उपप्रधानमन्त्री तथा अर्थमन्त्री विष्णुप्रसाद पौडेल र पोखरा महानगरपालिाकाका मेयर धनराज आचार्य घाइते भएका छन । घाइते दुवैलाई पोखरामा प्राथमिक उपचारपछि थप उपचारका लागि काठमाडौं लगिएको छ ।

हाल दुवै जनाको कीर्तिपुरस्थित बर्न अस्पतालमा उपचार भइरहेको छ । अस्पतालले मन्त्री पौडेल र आचार्य दुवैलाई सघन उपचार कक्षमा राखेर उपचार शुरू गरिएको जनाएको छ । अस्पतालले शनिवार साँझ विज्ञप्ति जारी गर्दै प्रारम्भिक मूल्यांकनअनुसार दुवै जनाको ५ देखि ६ प्रतिशत जलेको हुनाले अनुहारमा जलन भएकोले श्वासनली र फोक्सोमा असर पर्न सक्ने भन्दै उच्च निगरानीमा उपचार भइरहेको जनाएको हो ।

अस्पतालमा ४ जना डाक्टरहरूको संलग्नता उच्च निगरानीसहित उपचार जारी राखिएको छ । पोखरा महोत्सव उद्घाटनका क्रममा राष्ट्रिय गान सकिएपश्चात् डिजिटल युगको समय रहेको भन्दै पानसको दीप स्विच अन गरेर बालियो । सोही क्रममा बिजुलीबाट निल्ने बनाइएको झिल्काहरूसमेत बलिरहेका थिए ।

उद्घाटनका दुई चरणमध्ये स्विच थिचेर पानस बालिएपछि बेलुन उडाउने कार्यक्रम तय भयो । प्रमुख अतिथि अर्थमन्त्री पौडेल र पोखरा महानगरपालिकाका मेयर आचार्य स्टेजबाट तल ओलिए । कर्मचारीले बेलुन स्टेजअघि ल्याए सोही क्रममा आगोका भिल्कामा बेलुन परेपछि पड्कियो । पड्कँदा आगोको ठूलै मुश्लो देखिएको थियो ।

दुवैजना भाग्न खोजे पनि आगोको लपेटाले समातेकाले घाइते बन्न पुगेका थिए । ती बेलुनमा हाइड्रोजन ग्यास भरिएको थियो । ‘बेलुनमा हिलियम ग्यास भर्नुपर्नेमा हाइड्रोजन भरिएको रहेछ । हामीलाई यस विषयमा ख्याल नै भएन । दुर्घटनापछि मात्र थाहा भयो,’ महानगरका प्रवक्ता मोतीलाल तिम्सिनाले भने ।

डिजिटल रूपमा स्विच थिचेर स्वतः पानसमा बत्ती बलेको थियो । पोखरा भ्रमण वर्ष २०२५ लेखेको २ ब्यानरसहित थुप्रै बेलुनको दुईवटैै पोकाहरू उडाएर भ्रमण वर्षको सुभारम्भ गर्ने क्रममा बेलुनमा आगो सल्किएको थियो । बेलुनको आगो पौडेल र आचार्यको टाउकोमा खसेको थियो । आचार्यको देब्रे गाला र कपाल डढेको छ । विष्फोटमा परेका पौडेलको कपाल डढ्नुका साथै कानबाट रगत बगेको थियो । घटना भए पनि उक्त कार्यक्रम भने अघि बढ्यो ।

मेयर पुनः कार्यक्रममा फर्कने भन्दै कार्यक्रम अघि बढाई भ्रमण वर्ष घोषणासमेत गरिएको छ । २० लाख पर्यटक भित्र्याउने लक्ष्यका साथ पोखरा महानगरपालिकाले घोषणा गरेको ‘पोखरा भ्रमण वर्ष २०२५’ को शनिवार शुभारम्भ भएको हो । आन्तरिक र बाह्य गरी यसवर्ष २० लाख पर्यटक भित्र्याउने र पोखरामा पर्यटकको लागि आकर्षण थप्न विभिन्न प्याकेज दिने तयारीसाथ भ्रमण वर्ष घोषणा घटनापश्चात पनि गरिएको छ । पोखरालाई पर्यटन राजधानी घोषणा गरेको एक वर्ष पुग्नै लाग्दा महानगरले भ्रमण वर्ष मनाउन लागेको हो ।

गत वर्षको चैत ४ मा पोखरा पर्यटकीय राजधानी घोषणा भएको थियो । भ्रमण वर्षभरि नै पोखराको पर्यटन प्रवद्र्धनसम्बन्धी कार्यक्रमहरू सञ्चालन हुनेछन् । घोषणा कार्यक्रम तथा वर्षैभर अभियानका विभिन्न गतिविधि सञ्चालन गर्नका लागि मेयर आचार्यको संयोजकत्वमा १ हजार ५१ सदस्यीय मूलआयोजक समिति, प्रमुख आचार्यकै नेतृत्वमा ७३ सदस्यीय एक निर्देशक समिति र पर्यटन व्यवसायी गोपीबहादुर भट्टराईको संयोजकत्वमा २० सदस्यीय कार्य सम्पादन समिति र अन्य ४३ समिति गठन गरिएको छ ।