डोटीको पुरानो शैक्षिक संस्था सिताराम स्कुलमा पूर्व विद्यार्थी समाज गठन 

डोटी । सिताराम माध्यामिक विद्यालयमा अध्ययन गरेका विद्यार्थीहरुले पूर्वविद्यार्थी समाज गठन गरेका छन् । डोटी शिखर नगरपालिका वडा नम्बर ९ स्थित जिल्लाकै पुरानो शैक्षिक संस्था सितारामका पूर्व विद्यार्थीहरुले समाज गठन गरेका हुन् । समाजको शनिबार पहिलो साधारण सभा सम्पन्न भएको छ । 

तदर्थ समितिका अध्यक्ष लाल बहादुर कडायतको अध्यक्षतामा सम्पन्न भएको साधारण सभा कार्यक्रममा प्रमुख अतिथि विद्यालयका पूर्व प्रधानाध्यापक लोकराज पन्त रहेका थिए ।

कार्यक्रममा सुदूरपश्चिम विश्वविद्यालयका उपकुलपति तथा कैलाली बहुमुखी क्याम्पसका पूर्व क्याम्पस प्रमुख प्रा.डा. हेमराज पन्त, विद्यालय व्यवस्थापन समितिका अध्यक्ष पुष्पराज पन्त लगायत विद्यालयमा अध्ययन गरेका पूर्व विद्यार्थीहरुको सहभागिता रहेको थियो ।

समाजको प्रथम साधारण सभाले पुनः लाल बहादुर कडायतलाई नै अध्यक्ष चयन गरेको छ । कडायत विद्यालयका पूर्व प्रधानाध्यापकसमेत हुन् । त्यस्तै समाजको वरिष्ठ उपाध्यक्षमा भीम बहादुर बलायर, उपाध्यक्षमा कृष्ण बोहोरा, सचिवमा जयराज ओझा, कोषाध्यक्षमा वीर बहादुर कुँवर चयन भएका छन् । 

सिताराम विद्यालयको स्थापना २०१७ सालमा भएको हो । उक्त विद्यालयमा पूर्व प्रधानमन्त्री शेर बहादुर देउवा, एमाले सचिव लेखराज भट्ट, काँग्रेस नेता वीर बहादुर बलायरले अध्ययन गरेका हुन् ।