संविधान दिवसको अवसरमा शैलेश्वरी इङ्ग्लिश बोर्डिङ र फारवेष्ट सेकेन्डरी स्कुलद्वारा बृहत् र्याली सम्पन्न !

धनगढी :- राष्ट्रिय संविधान दिवसको पावन अवसर पारेर धनगढीस्थित शैलेश्वरी इङ्ग्लिश बोर्डिङ स्कुल र फारवेष्ट सेकेन्डरी स्कुल (Far West Secondary School) को संयुक्त आयोजनामा एक भव्य तथा बृहत् प्रभातफेरी (र्याली) कार्यक्रम सफलतापूर्वक सम्पन्न भएको छ।

विद्यार्थीहरूमा संवैधानिक अधिकार, नागरिक कर्तव्य र राष्ट्रियताप्रतिको सजगता अभिवृद्धि गर्ने उद्देश्यले आयोजना गरिएको उक्त र्याली विद्यालय प्राङ्गणबाट प्रारम्भ भई धनगढी-५, हसनपुरस्थित पिपल चौतारासम्म पुगेर विशेष कोणसभामा परिणत भएको थियो।
र्यालीमा दुवै विद्यालयका सञ्चालक, प्रधानाध्यापक, शिक्षक-शिक्षिका, कर्मचारी तथा सयौँको संख्यामा रहेका विद्यार्थीहरूको उत्साहजनक सहभागिता रहेको थियो। सहभागी विद्यार्थीहरूले हात-हातमा राष्ट्रिय झण्डाका साथै संविधानको पालना, राष्ट्रिय एकता र लोकतान्त्रिक मूल्य-मान्यता झल्किने विभिन्न सचेतनामूलक नारा अङ्कित प्लेकार्डहरू प्रदर्शन गरेका थिए।

कोणसभालाई सम्बोधन गर्दै शैलेश्वरी इङ्ग्लिश बोर्डिङ स्कुल र फारवेष्ट सेकेन्डरी स्कुलका प्रतिनिधिहरूले संविधान दिवसले सम्पूर्ण नेपालीहरूलाई आपसी भाइचारा र एकताको सूत्रमा बाँध्न प्रेरणा दिने बताए। साथै, विद्यार्थीहरूलाई सानै उमेरदेखि देशको मूल कानून र लोकतन्त्रबारे व्यावहारिक जानकारी गराउन यस्ता संयुक्त कार्यक्रमहरूले महत्त्वपूर्ण भूमिका खेल्ने विश्वास व्यक्त गरे।
स्थानीय अभिभावक तथा सर्वसाधारणको समेत उल्लेख्य उपस्थिति रहेको उक्त कार्यक्रम शान्तिपूर्ण र भव्य रूपमा सम्पन्न भएको आयोजक समितिले जनाएको छ।