काठमाडौं । नेकपा (एमाले)का मुख्य सचेतक ऐनबहादुर महरले कैलालीमा भएको सांघातिक आक्रमणको घटनाप्रति सरकारको ध्यानाकर्षण गराएका छन् । मंगलबार (असार २) प्रतिनिधिसभा बैठकमा सांसद महरले उक्त घटनाबारे सदनलाई जानकारी गराएका हुन् ।
उनले राष्ट्रिय स्वतन्त्र पार्टी (रास्वपा)का नेता शैलेश सिंहमाथि धनगढीमा भएको सांघातिक आक्रमणको घटनाप्रति आपत्ति जनाए । रास्वपा सुदूरपश्चिम प्रदेशको अधिवेशनबाट घर फर्कने क्रममा सोमबार (असार १० राति सात–आठजनाको समूहले सिंहमाथि योजनाबद्ध रूपमा आक्रमण गरेको उनले जानकारी दिए ।
आक्रमणकारीले सिंहलाई घाइते बनाउनुका साथै उनको साथमा रहेको ल्यापटप, मोबाइल, घडी र सुनको सिक्री समेत लुटेको सांसद महरले बताए ।
सांसद महरले मुलुकमा अराजकता र दण्डहीनता बढेको भन्दै चिन्ता व्यक्त गरे । आफ्नै पार्टी सरकारको नेतृत्वमा रहेको अवस्थामा समेत जिम्मेवार नेतामाथि आक्रमण हुनुले सुरक्षा व्यवस्थामाथि प्रश्न उठाउन सकिने उनको भनाइ छ ।
उनले घाइते सिंहको शीघ्र स्वास्थ्यलाभको कामना गरे । आक्रमणमा संलग्न दोषी तत्काल पहिचान गरी कानुनी कारबाहीको दायरामा ल्याउन उनले गृह मन्त्रालयको ध्यानाकर्षण गराए ।
प्रतिक्रिया दिनुहोस्