सांसद महावीर पुनले आफू मन्त्री बन्नेबारे केही जानकारी नआएको बताएका छन् ।
प्रधानमन्त्री वालेन्द्र (बालेन) शाहले उनलाई विज्ञान, प्रविधि तथा नवप्रवर्तन मन्त्रीमा नियुक्तिका लागि सिफारिस गरेको विषयमा आफूलाई थाहा नभएको पुनको प्रतिक्रिया छ ।
‘१ बजेदेखि सदन छ, म यता सदन आइसकेँ । मन्त्री सिफारिस गरेका विषयमा मलाई कसैले केही भनेको छैन’, पुनले लोकान्तरसँग भने ।
यता प्रधानमन्त्री कार्यालय स्रोतले भने उनलाई मन्त्रीका लागि राष्ट्रपति कार्यालयमा सिफारिस गरिसकेको बताएको छ ।
मंगलबार नै सुधन गुरुङ समेत पुन: गृहमन्त्री नियुक्त हुँदैछन् । पुन र गुरुङको दिउँसो ३ बजे राष्ट्रपति कार्यालयमा शपथ गराउने तयारी छ ।
तर दिउँसो १ बजेसम्म पनि आफूलाई कुनै जानकारी नभएको सांसद पुनले बताए ।
गत फागुन २१ गतेको प्रतिनिधिसभा निर्वाचनमा पुन म्याग्दीबाट स्वतन्त्र सांसदका रूपमा निर्वाचित भएका थिए ।
पुन यसअघि सुशीला कार्की नेतृत्वको सरकारमा शिक्षामन्त्री थिए ।
प्रतिक्रिया दिनुहोस्