दार्चुलामा मासु काटिरहेको अवस्थामा २ जना पक्राउ ,गाई काटेको आरोप

दार्चुला – दार्चुला जिल्लाको महाकाली नगरपालिकामा गाई काटिएको आशंकासहित प्रहरीले दुई जनालाई नियन्त्रणमा लिएको छ। स्थानीय तहमा हराएको गाईसँग सम्बन्ध जोडिँदै गएपछि घटनाले थप चासो बढाएको हो।

जिल्ला प्रहरी कार्यालय दार्चुलाका अनुसार महाकाली नगरपालिका–१ स्थित लास्कुखोला क्षेत्रबाट दुई जनालाई आइतबार पक्राउ गरिएको हो।उनीहरुको नाम भने अहिलेलाई गोप्य राखिएको छ । उनीहरूलाई शंकास्पद अवस्थामा मासु काटिरहेको देखेपछि स्थानीयको सूचनाका आधारमा प्रहरीले नियन्त्रणमा लिएको जनाएको छ।

प्रहरीका अनुसार पक्राउ परेका दुवै जनामाथि पशुपन्छी हत्या सम्बन्धी कसुरमा अनुसन्धान अघि बढाइएको छ। प्रारम्भिक अनुसन्धानका क्रममा महाकाली नगरपालिका–४ निवासी एक महिलाको गाई केही दिनदेखि हराइरहेको खुलेको छ। सोही हराएको गाईसँग सम्बन्धित हुन सक्ने आशंकामा उनीहरूलाई नियन्त्रणमा लिएर थप अनुसन्धान भइरहेको प्रहरीले जनाएको छ।

स्थानीयवासीले लास्कुखोलामा मासु काटिरहेको गतिविधि देखेपछि प्रहरीलाई खबर गरेका थिए। घटनास्थलबाट केही प्रमाणहरू समेत संकलन गरिएको र परीक्षणका लागि पठाउने तयारी भइरहेको बताइएको छ। यद्यपि, पक्राउ परेका व्यक्तिहरूले काटिएको जनावर सोही हराएको गाई हो वा होइन भन्ने विषय अझै पुष्टि भइसकेको छैन।

प्रहरीले घटनालाई गम्भीर रूपमा लिएर अनुसन्धान तीव्र पारेको जनाएको छ। आवश्यक कानुनी प्रक्रिया पूरा गरी दोषी ठहरिएमा प्रचलित कानूनअनुसार कारबाही गरिने प्रहरीको भनाइ छ।

यस घटनाले स्थानीय क्षेत्रमा पशु सुरक्षा र कानुनी व्यवस्थाबारे पुनः बहस सुरु गराएको छ भने ग्रामीण क्षेत्रमा यस्ता गतिविधि नियन्त्रणका लागि निगरानी बढाउनुपर्ने आवश्यकता औंल्याइएको छ।