काठमाडौं । अब सडकमा दुर्घटना हुँदा घाइतेलाई सहयोग गर्ने मानिस कानुनी झमेलामा पर्ने डर हट्ने भएको छ। सरकारले ‘असल उद्धारकर्ता’ सम्बन्धी नयाँ कानुनी व्यवस्था प्रस्ताव गरेको छ।
अहिलेसम्म दुर्घटना देख्दा धेरै मानिसहरू सहयोग गर्न डराउँथे, किनभने पछि प्रहरीको सोधपुछ, बयान र कानुनी प्रक्रिया झेल्नुपर्ने डर हुन्थ्यो। तर अब यस्तो अवस्था अन्त्य गर्ने तयारी गरिएको हो।
नयाँ प्रस्तावअनुसार अब कसैले घाइतेलाई अस्पताल पुर्यायो भने उसलाई कुनै पनि कानुनी समस्या हुँदैन। सहयोग गर्ने क्रममा गल्तीले बिरामीको अवस्था बिग्रिए वा मृत्यु भए पनि उद्धारकर्तामाथि मुद्दा लाग्ने छैन।
त्यस्तै, अस्पतालले पनि अब घाइतेलाई तुरुन्त उपचार सुरु गर्नैपर्नेछ। पैसा वा कागजको कारण देखाएर उपचार रोक्न पाइने छैन।
प्रहरीले पनि उद्धार गर्ने व्यक्तिलाई अनावश्यक झन्झट दिन पाउने छैन र चाहेको खण्डमा उसको पहिचान गोप्य राख्न सकिनेछ।
यो व्यवस्था लागू भएमा अब मानिसहरू निडर भएर दुर्घटनाका घाइतेलाई सहयोग गर्नेछन् र समयमै उपचार पाउँदा धेरैको ज्यान बच्ने अपेक्षा गरिएको छ।
प्रतिक्रिया दिनुहोस्