काठमाडौँमा सशस्त्र प्रहरी बलको नेतृत्व परिवर्तन हुने तयारी अन्तिम चरणमा पुगेको छ। वर्तमान अतिरिक्त महानिरीक्षक (एआईजी) नारायणदत्त पौडेल संगठनको नयाँ महानिरीक्षक (आइजिपी) बन्ने लगभग निश्चित भएको छ। सोमबार बस्ने मन्त्रिपरिषद् बैठकले उनलाई औपचारिक रूपमा उक्त जिम्मेवारी दिने अपेक्षा गरिएको छ।
हालका आइजिपी राजु अर्यालको चार वर्षे कार्यकाल वैशाख १८ गते सकिँदैछ, जससँगै उनी अवकाशमा जानेछन्। त्यसपछि संगठनको कमान्ड पौडेलले सम्हाल्नेछन्।
पौडेलले २०५४ साल चैत १८ गते नेपाल प्रहरीमा प्रहरी निरीक्षकका रूपमा सेवा सुरु गरेका थिए। पछि २०५८ सालमा सशस्त्र प्रहरी बल स्थापना हुँदा उनी डिएसपी तहमा समायोजन भएका थिए।
आइजिपी पदका लागि एआईजी बंशीराज दाहाल र गणेश ढाडा पनि दाबेदार थिए। तर सरकारले वरिष्ठता र ज्येष्ठताको आधारमा पौडेललाई प्राथमिकता दिने निर्णय गरेको छ। पौडेल २०७९ साल जेठ ६ गते एआईजीमा बढुवा भएका थिए भने दाहाल सोही वर्ष असोज २८ गते उक्त पदमा पुगेका थिए।
हालको नियम अनुसार ३० वर्षे सेवा अवधि कायम रहेमा पौडेलले करिब २३ महिना संगठनको नेतृत्व गर्नेछन्। यदि सेवा अवधि ३२ वर्ष पुर्याइएमा भने उनको कार्यकाल अझै करिब दुई वर्ष लम्बिन सक्ने देखिन्छ।
प्रतिक्रिया दिनुहोस्