सुदूरपश्चिम प्रदेश सरकारले आगामी आर्थिक वर्ष २०८३/८४ का लागि प्रदेशअन्तर्गतका ८८ स्थानीय तहलाई समानीकरण अनुदान स्वरूप कुल ९१ करोड ८० लाख रुपैयाँ वितरण गर्ने निर्णय गरेको छ। आर्थिक मामिला मन्त्रालयका अनुसार उक्त अनुदान न्यूनतम, सूत्रमा आधारित र कार्यसम्पादन मूल्यांकन गरी तीन आधारमा बाँडफाँट गरिनेछ।
यसअनुसार १५ करोड ८१ लाख ६५ हजार रुपैयाँ न्यूनतम अनुदानका रूपमा, ७२ करोड ३१ लाख १५ हजार रुपैयाँ सूत्रमा आधारित वितरण र ३ करोड ६७ लाख २० हजार रुपैयाँ कार्यसम्पादनका आधारमा स्थानीय तहलाई उपलब्ध गराइनेछ।
गत आर्थिक वर्ष २०८२/८३ मा प्रदेश सरकारले ९० करोड रुपैयाँ अनुदान छुट्याएको थियो, जसअन्तर्गत रकम तीन किस्तामा निकासा गर्ने व्यवस्था गरिएको थियो र दुई किस्ता रकम पहिल्यै वितरण भइसकेको मन्त्रालयले जनाएको छ।
आगामी वर्षका लागि सबैभन्दा बढी अनुदान धनगढी उपमहानगरपालिकाले प्राप्त गर्नेछ, जसले २ करोड ७० लाख ७ हजार रुपैयाँ पाउनेछ। त्यसपछि भीमदत्त नगरपालिका दोस्रो स्थानमा रहेको छ, जसलाई २ करोड ४२ लाख ५९ हजार रुपैयाँ उपलब्ध हुनेछ।
अर्कोतर्फ, सबैभन्दा कम अनुदान साइपाल गाउँपालिकाले पाउने भएको छ। उसले आगामी वर्ष ४४ लाख ७७ हजार रुपैयाँ प्राप्त गर्नेछ।
प्रतिक्रिया दिनुहोस्