प्रधानमन्त्री कप फाइनल : आर्मीलाई सुदूरपश्चिमले दियो १६२ रनको लक्ष्य

काठमाडौं । सुदूरपश्चिम प्रदेशले प्रधानमन्त्री कप एकदिवसीय क्रिकेट प्रतियोगिताको फाइनलमा विभागीय टिम त्रिभुवन आर्मी क्लबसामु १६२ रनको लक्ष्य प्रस्तुत गरेको छ । शुक्रबार (वैशाख ४) वीरगन्जको नारायणी क्रिकेट मैदानमा टस जितेर ब्याटिङ रोजेको सुदूरपश्चिमले ३९.४ ओभरमा सबै विकेट गुमाएर १६१ रन बनाएको हो ।

सुदूरपश्चिमका अशोक धामीले सर्वाधिक ४३ रनको योगदान गरे । किरण ठगुन्नाले ३५ रन जोडे । नारायण जोशीले २९, हेमन्त धामीले १६ रन बनाए ।  

आर्मीका आकाश चन्द र साहब आलमले समान तीन विकेट लिए । बसिर अहमदले दुई, कुशल मल्लले एक विकेट लिए ।

आर्मी सुदूरपश्चिमलाई हराउँदै तेस्रोपटक उपाधि घर ल्याउने लक्ष्यमा छ । आर्मीले यसअघि सन् २०१७ र २०२१ मा प्रतियोगिताको उपाधि जितेको थियो । सुदूरपश्चिम भने पहिलोपटक विजेताको सूचीमा आफ्नो नाम लेखाउने दाउमा छ । 

सुरुआती संस्करणदेखि नै प्रतियोगितामा प्रतिस्पर्धा गरिरहेको सुदूरपश्चिमले यसपालि पहिलोपटक फाइनलमा स्थान बनाएको हो । यसअघिका सातै संस्करणमा सुदूरपश्चिमले समूह चरण पार गर्न सकेको थिएन ।