धनगढी । राष्ट्रिय स्वतन्त्र पार्टी सुदूरपश्चिम प्रदेश कमिटीले नाकामा हेल्प डेस्क सञ्चालनमा ल्याएको छ ।
दशैँ, तिहार र छठ पर्वलाई लक्षित गर्दै रास्वपाले असोज १५ (आज)देखि सुदूरपश्चिम प्रदेशको प्रमुख व्यापारिक नाका गौरिफन्टामा हेल्प डेस्क सञ्चालनमा ल्याएको हो ।
चाडपर्व नजिकिएसँगै रोजगारीका लागि भारतका विभिन्न शहर पुगेका सुदूरपश्चिमेली नागरिकहरु पनि गाउँ फर्किने क्रम बढ्दो छ । यहीबीच नाकामा नागरिहरुको सहजताका लागि हेल्प डेस्क सञ्चालन गरेको रास्वपा सुदूरपश्चिम प्रदेश कमिटीका सदस्य झनक खनालले बताएका छन् ।
खनालका अनुसार हाल स्वदेश फर्किने नागरिकहरुलाई नाकामा पानी वितरण, ब्लड प्रेसर चेकजाँच, ज्वरो जाँच तथा आवश्यक औषधी निःशुल्क वितरण गरिँदै आएको छ । यसका साथै सामान्य घाउचोटपटक लागेका वा सामान्य बिरामीको प्राथामिक उपचार सेवा पनि उपलब्ध गराउँदै आएको खनालले जानकारी दिएका छन् ।
नाकामा रास्वपाको उक्त हेल्प डेस्कले निकै सहज भएको स्वदेश फर्किने नागरिकहरुले प्रतिक्रिया दिएका छन् ।
प्रतिक्रिया दिनुहोस्