छैटौँ दिन पनि उठाइएन सिंहदरबारको फोहोर

काठमाडौं: काठमाडौं महानगरपालिकाले आज पनि राष्ट्रपति भवन, प्रधानमन्त्री निवास र सिंहदरबारको फोहोर उठाएको छैन । महानगर प्रमुख बालेन शाह (बालेन्द्र) को निर्देशनका कारण शुक्रबार पनि सिंहदरबारको फोहोर नउठाइएको हो ।

‘महानगरले नभनेसम्म हामी फोहोर उठाउन सक्दैनौँ,’ परिवर्तन नेपालका व्यवस्थापक प्रमुख मित्र घिमिरेले भने ।

अहिले सिंहदरबारभित्रका सबै कार्यालयबाट फोहोर उठाएर कम्पाउन्डभित्रै राखिएको छ । मेयर शाहले गत शनिबार बिहान सामाजिक सञ्जालमार्फत सिंहदरबारको फोहोर नउठ्ने बताएका थिए ।

महानगरका प्रवक्ता नवीन मानन्धरले सरकारले वार्ता गर्न नबोलाएसम्म सिंहदरबारबाट फोहोर नउठ्ने बताएका छन् । ‘जबसम्म सरकारले वार्ता गर्न बोलाउँदैन हामीले फोहोर उठाउने काम रोक्छौँ,’ उनले भने ।