काठमाडौं । नेपाली कांग्रेसका सभापति गगन थापाले प्रधानमन्त्रीको निजी क्षेत्रप्रतिको दृष्टिकोण सकारात्मक नरहेको टिप्पणी गरेका छन् ।
गिरिजाप्रसाद कोइराला फाउन्डेसनले शुक्रबार काठमाडौंमा आयोजना गरेको कार्यक्रममा थापाले वर्तमान प्रधानमन्त्रीले निजी क्षेत्रलाई मन नपराउने र उपेक्षा गर्ने गरेको दाबी गरे ।
दुग्ध विकास संस्थान, हेटौँडा कपडा कारखाना र नेपाल औषधि लिमिटेडजस्ता सार्वजनिक संस्थान सञ्चालन भएर नाफामा गएको हेर्न आफूलाई पनि शुभेच्छा रहेको भन्दै उनले राज्य सञ्चालकले निजी क्षेत्र र समग्र अर्थतन्त्रको यथार्थ बुझ्न आवश्यक रहेको बताए ।
२०४६ सालको राजनीतिक परिवर्तनपछि गिरिजाप्रसाद कोइरालाको नेतृत्वमा अघि बढाइएको आर्थिक उदारीकरण र त्यसअनुसारका नीतिहरूको महत्त्व अहिले पनि उत्तिकै रहेको थापाको भनाइ थियो ।
विपद्पछिको पुनर्निर्माणका लागि ठूलो स्रोत परिचालन गर्नुपर्ने अवस्था रहेको उल्लेख गर्दै उनले प्रधानमन्त्रीको सोच नै सरकारका निर्णयमा प्रतिबिम्बित हुने भएकाले मुलुकलाई सही आर्थिक दृष्टिकोण आवश्यक रहेको बताए ।
सभापति थापाले कांग्रेसको महाधिवेशन तोकिएकै मितिमा हुने पनि स्पष्ट पारे । महाधिवेशनको मितिलाई लिएर कुनै अन्योल नरहेको भन्दै उनले पार्टीभित्र स्वस्थ प्रतिस्पर्धा हुने बताए ।
प्रतिस्पर्धाबाट नेतृत्वमा आउने र नआउने सबैलाई समेटेर कांग्रेसलाई एकताबद्ध बनाउने उनको भनाइ थियो ।
नागरिकसँग टुटेको विश्वास पुनःस्थापित गर्न कांग्रेसले महाधिवेशन र दशैंलगत्तै देशव्यापी अभियान सञ्चालन गर्ने तयारी गरेको पनि थापाले जानकारी दिए ।
उनका अनुसार अभियानअन्तर्गत कांग्रेस ७७ वटै जिल्लाका गाउँ–गाउँमा पुग्नेछ ।
प्रतिक्रिया दिनुहोस्