माइतीघरको लफडामा शोभा र महेशको आ–आफ्नै दाबी

काठमाडौँ । नेकपा एमाले सचिव महेश बस्नेतकी पत्नी अम्बिका बस्नेत र शोभा पाठकबिच भुतलाभुतल भएपछि पाठक र महेश दुवैले एक अर्कालाई आरोप लगाएका छन्। 

सोमबार दिउँसो माइतीघरमा दुई महिला पाठक र बस्नेतबिच हात हालाहाल र भुतलाभुतल भएको थियो । घटनापछि प्रहरीले दुवैलाई नियन्त्रणमा लिएको थियो। 

घटना लगत्तै पाठकले महेश बस्नेतकी श्रीमती र नेकपा एमालेका कार्यकर्ताले आफूमाथि आक्रमण गरेको बताएकी छन् । ‘म माइतीघर मण्डलामा बसिरहेको बेला न्यायप्रेमी पत्रकार र आमाबुवा दाजुभाइ दिदीबहिनीलाई अनुरोध गर्न चाहन्छु। मेरो ज्यान मार्न आएको त्यो जमातलाई प्रहरी परिसर प्रमुख एमाले निकट भएको कारणले मलाई शङ्का छ’, पाठकले भनेकी छन्, ‘म यतिबेला ट्रमा सेन्टरमा छु।’

त्यस्तै एमाले सचिव महेश बस्नेतले आफू र आफ्नो परिवारमाथि गरिएको साइबर अपराधविरुद्ध उजुरी दिन साइबर ब्युरो जाने क्रममा माइतीघर क्षेत्रमा भएको भिडभाड झ्यालबाट हेर्दै गर्दा त्यहाँ उपस्थित केही व्यक्तिहरू केटा मान्छेले आफ्नी श्रीमतीसहित केही महिलालाई गालीगलौज र हातपात गरेको बताएका छन् । 

‘उल्टै, मेरो श्रीमतीसहित आठ जनालाई  प्रहरीले गिरफ्तार गरेको छ’,बस्नेतले सामाजिक सञ्जालमा भनेका छन्,‘यस घटनालाई केही सञ्चार माध्यमहरूले गलत ढङ्गले प्रस्तुत गर्दै भ्रामक प्रचार गरिरहेका छन्, जुन अत्यन्तै दुःखद र आपत्तिजनक छ ।’