सुकुम्बासीमाथि बल प्रयोग नगर्न मानव अधिकार आयोगको निर्देशन

काठमाडौं । राष्ट्रिय मानव अधिकार आयोगले अतिक्रमित जग्गा खाली गराउँदा अत्यधिक बल प्रयोग नगर्न सरकारलाई निर्देशन दिएको छ । 

प्रेस विज्ञप्ति जारी गर्दै आयोगले सुकुम्बासी बस्ती खाली गराउने सरकारको तयारीप्रति ध्यानाकर्षण भएको जनाएको छ । आयोगले भनेको छ, “नेपाल सरकारबाट २०८३ वैशाख १२ गतेदेखि काठमाडौँ जिल्लाको बागमती किनारलगायत विभिन्न स्थानमा बसोबास गरेका सुकुम्बासीहरूको घर टहरा हटाउने भनिएको विषयमा आयोगको ध्यानाकर्षण भएको छ ।”

आयोगले अतिक्रमित जग्गा खाली गराउँदा अत्यधिक बल प्रयोग नगर्न पनि निर्देशन दिएको छ । ‘…आयोगका सिफारिशहरू र सर्वोच्च अदातलबाट भएका आदेशको कार्यान्वयन गर्दै वास्तविक सुकुम्बासीहरूको पहिचान एवं आवश्यक व्यवस्थापन गरी अतिक्रमित जग्गाका घर टहरा खाली गराउने क्रममा अत्यधिक बलको प्रयोग नगर्न र संयमित हुन आयोग नेपाल सरकारलाई निर्देशन गर्दछ,’ आयोगले भनेको छ । 

आयोगले वास्तविक सुकुम्बासीको पहिचान गरेर वैकिल्पक व्यवस्था गर्न भनेको छ । 

सरकारले शुक्रबार साँझ ७ बजेसम्म थापाथलीका लगायतका नदी किनारका सुकुम्बासीलाई घर टहरा खाली गर्न भनेको छ ।