सुदूरपश्चिमका मन्त्रालय र जिल्ला प्रशासनको आगो धनगढी उपमहानगरले निभायो

धनगढी : सुदूरपश्चिम प्रदेशका मन्त्रालयहरू, जिल्ला प्रशासन कार्यालय, भन्सार कार्यालय लगायतमा लगाइएको आगो नियन्त्रणमा लिएको छ। धनगढी उपमहानगरपालिकाले दमकलको प्रयोग गरेर आगो निभाएको हो।

धनगढी उपमहानगरपालिकाका नगर प्रहरीले दमकलको प्रयोगबाट आर्थिक मामिला मन्त्रालय, भौतिक पूर्वाधार विकास मन्त्रालय, भूमिगत जलस्रोत कार्यालय, डिभिजन वन कार्यालय, जिल्ला प्रशासन कार्यालय, कैलाली भन्सार कार्यालय, आन्तरिक राजस्व कार्यालय, यातायात कार्यालय धनगढी–१३  को वडा कार्यालयमा लगाइएको आगो नियन्त्रणमा लिएका हुन।

धनगढीमा जेन–जी पुस्ताको आन्दोलनका क्रममा लगाइएको आगो मङ्गलवार राति उपमहानगरपालिकाको दमकलको सहयोगमा नियन्त्रणमा लिइएको हो। धनगढी उपमहानगरपालिकाका अनुसार बुधवार पनि जिल्ला प्रशासन कार्यालय, कैलाली, यातायात कार्यालय, कैलाली र आन्तरिक राजस्व कार्यालय, कैलालीमा फेरि सल्किएको आगो निभाइएको छ। धनगढी उपमहानगरपालिकाले मङ्गलवार दिउँसो जेन–जी पुस्ताको आन्दोलनका कारण आगो निभाउन नसकिएको बताएको छ। तर, रातिको समयमा सबै मन्त्रालय तथा कार्यालयहरूको आगो निभाइएको हो।

मुख्यमन्त्री तथा मन्त्रीपरिषद्को कार्यालय, सुदूरपश्चिम प्रदेश सभा, आन्तरिक मामिला तथा कानुन मन्त्रालय, सामाजिक विकास मन्त्रालय, मालपोत कार्यालय, नापी कार्यालय, भूमि व्यवस्था कृषि तथा सहकारी मन्त्रालय, सहरी विकास तथा भवन निर्माण विभाग, सङ्घीय आयोजना कार्यान्वयन इकाई, जिल्ला प्रशासन कार्यालय, कैलाली भन्सार कार्यालय, यातायात कार्यालय, डिभिजन वन कार्यालय, सडक डिभिजन कार्यालय, हुलाकी सडक कार्यालय, पूर्व प्रधानमन्त्री शेरबहादुर देउवाको धनगढीस्थित निजी निवास लगायतमा आगो लगाइएको थियो।

मुख्यमन्त्री तथा मन्त्रीपरिषद्को कार्यालय लगायतका मन्त्रालय तथा विभिन्न कार्यालयहरूमा गरिएको आगलागीबाट भएको क्षतिको विवरण भने आएको छैन। तर, प्रदेश सरकार र मातहतका कार्यालयहरूमा आगोका कारण ठूलो क्षति भएको अनुमान गरिएको छ।