विश्वको सबैभन्दा ठूलो क्रिकेट लिगका रुपमा परिचित आईपीएलको खेलतालिका सार्वजनिक

एजेन्सी : इन्डियन प्रिमियर लिग (आईपीएल) को खेलतालिका सार्वजनिक भएको छ । विश्वको सबैभन्दा ठूलो क्रिकेट लिगका रुपमा परिचित आईपिएल २२ मार्चदेखी सुरु हुने भएको हो । सार्वजनिक तालिकाअनुसार उद्घाटन खेल कोलकातामा डिफेन्डिङ च्याम्पियन कोलकाता नाइट राइडर्स (केकेआर) र रोयल च्यालेन्जर्स बैंगलोर (आरसीबी) बीच खेलिनेछ ।

तालिका अनुसार यसपटक ६५ दिनमा ७४ खेल खेलाइनेछन । मे १८ सम्ममा लिग चरणका ७० खेल हुनेछन्, जसमा १२ डबल हेडर अर्थात् १ दिनमा २ खेल पनि समावेश छन् । आईपीएलमा प्रतियोगिताको उद्घाटन र फाइनल खेल डिफेन्डिङ च्याम्पियन टोलीको घरेलु मैदानमा खेलाउने परम्परा रहिआएको छ । यस पटक पनि यी दुवै खेल कोलकाताको इडेन गार्डेन स्टेडियममा हुनेछन् । आईपिएलको फाईनल खेल मे २५ मा हुनेछ ।

गत सिजनको उपविजेता टोली सनराइजर्स हैदराबादको घरेलु मैदान राजीव गान्धी स्टेडियममा दुई प्लेअफ खेलहरू पनि आयोजना गरिनेछ । यहाँ क्वालिफायर–१ मे २० मा र एलिमिनेटर मे २१ मा खेलाइनेछ ।

१३ स्टेडियममा १० टोलीको खेल

अहमदाबाद, मुम्बई, चेन्नई, बेंगलुरु, लखनऊ, मुल्लानपुर (मोहाली), दिल्ली, जयपुर, कोलकाता, हैदराबाद १० टोलीका घरेलु मैदान हुन् । यी बाहेक, खेलहरू गुवाहाटी, विशाखापट्टनम र धर्मशाला सहित कुल १३ स्थलहरूमा खेलाइनेछ । प्रतियोगितामा १३ वटा स्थानमा ६५ दिनमा १० टोलीहरू बीच ७४ खेलहरू हुनेछन् ।