सुर्खेत । शिक्षा तथा खेलकुदमन्त्री सस्मित पोखरेलले विश्वविद्यालयको पाठ्यक्रमलाई अत्याधुनिक तथा रोजगारमुखी बनाउन सरकारले आवश्यक पहल गरिरहेको बताएका छन् ।
बुधबार मध्यपश्चिम विश्वविद्यालयको दीक्षान्त समारोहलाई सम्बोधन गर्दै मन्त्री पोखरेलले पाठ्यक्रम सुधारका लागि आवश्यक बजेट, पूर्वाधार तथा विशेषज्ञ जनशक्तिको व्यवस्था गर्न सरकार प्रतिबद्ध रहेको बताए । उनले भने, “त्यसका लागि हामीले आवश्यक बजेट, पूर्वाधार र विशेषज्ञको व्यवस्था गर्न भरपुर प्रयास गर्नेछौँ ।”
विश्वविद्यालयले स्थानीय आवश्यकता पहिचान गरी कर्णाली प्रदेशमा प्रशस्त मात्रामा उपलब्ध जलस्रोत, वन, जडीबुटी, पर्यटन तथा सांस्कृतिक सम्पदासम्बन्धी अनुसन्धानलाई प्राथमिकतामा राख्नुपर्नेमा उनले जोड दिए ।
मन्त्री पोखरेलले उच्च शैक्षिक मापदण्ड कायम गर्न, डिजिटल शिक्षाको विस्तार गर्न तथा रोजगारमुखी कार्यक्रम सञ्चालनका लागि आफ्नो मन्त्रालयबाट आवश्यक सहयोग उपलब्ध गराइने बताए । “म सरकार तथा मन्त्रालयको तर्फबाट यो विश्वविद्यालयलाई उच्च शैक्षिक मापदण्ड, डिजिटल शिक्षा र रोजगारउन्मुख कार्यक्रमका लागि आवश्यक सहयोग गर्न पूर्णतः प्रतिबद्ध छु,” उनले भने ।
मध्यपश्चिम विश्वविद्यालयलाई कर्णाली प्रदेशकै गौरवको शैक्षिक संस्थाका रूपमा उल्लेख गर्दै उनले शैक्षिक गुणस्तर अभिवृद्धि, अनुसन्धान तथा प्रविधिको क्षेत्रमा विश्वविद्यालयले उदाहरणीय योगदान पुर्याएको बताए । स्थापना भएको करिब दुई दशकको अवधिमा अनुसन्धानमूलक शिक्षा, खेलकुद, डिजिटल शैक्षिक प्रविधि तथा नवीनतम प्रविधिको प्रयोग सुनिश्चित गर्न विश्वविद्यालयले देखाएको प्रतिबद्धता प्रशंसनीय रहेको उनको भनाइ थियो ।
दीक्षित विद्यार्थीलाई सम्बोधन गर्दै मन्त्री पोखरेलले प्राप्त शिक्षा व्यक्तिगत उपलब्धिमा मात्र सीमित नरही समाज र राष्ट्र निर्माणको महत्वपूर्ण माध्यम भएको बताए । उनले गुणस्तरीय शिक्षाले देशले भोगिरहेका अभाव, गरिबी, बेरोजगारी, स्वास्थ्य चुनौती, जलवायु परिवर्तन, सूचना प्रविधि तथा जैविक विविधतासम्बन्धी समस्याको समाधान खोज्न महत्त्वपूर्ण भूमिका खेल्ने विश्वास व्यक्त गरे ।
प्रतिक्रिया दिनुहोस्