आफैलाई गोली प्रहार गरेका कञ्चनपुरका प्रहरी जवान बिष्टको मृत्यु

कञ्चनपुर : कञ्चनपुरमा आफैले आफैलाई गोली प्रहार गरेका प्रहरी जवान वकिल बिष्टको मृत्यु भएको छ । कञ्चनपुरको महेन्द्रनगरस्थित सुदूरपश्चिम विपद् व्यवस्थापन गुल्ममा कार्यरत विष्टको उपचारका क्रममा शुक्रबार मृत्यु भएको हो ।

कैलालीको निसर्ग अस्पतालमा उपचारका क्रममा प्रहरी जवान विष्टको मृत्यु भएको जिल्ला प्रहरी कार्यालय कञ्चनपुरका प्रहरी नायब उपरीक्षक उमेशराज जोशीले बताए । माघ ९ गते बुधबार राति कोत गादरमा (हतियार राखिने ठाउँ) ड्युटीमा रहेका बेला विष्टले आफैँलाई टाउकोमा गोली प्रहार गरेका थिए ।

गोली लागेर गम्भीर घाइते भएका उनलाई तत्कालै उपचारका लागि महाकाली प्रादेशिक अस्पताल लगिए पनि उपचार हुन नसकेपछि कैलालीको निसर्ग अस्पतालमा उपचारार्थ भर्ना गरिएको थियो । उपचारकै क्रममा उनको मृत्यु भएको बताईएको छ ।