घोडाघोडी तालमा घुम्न आउने पर्यटकको तस्बिर खिच्ने युवाको लोभलाग्दो आम्दानी

कैलाली: विश्व सिमसार क्षेत्र घोडाघोडी तालमा घुम्न आउने पर्यटकको तस्बिर खिचेर स्थानीय युवाले मनग्गे आम्दानी गर्न थालेका छन्। घोडाघोडी नगरपालिका–१, सुखडमका गौतम बुढा तस्बिर र भिडियो खिचेर मनग्गे आम्दानी गरेको बताउँछन् ।

विवाह, व्रतबन्धलगायतको कार्यक्रममा तस्बिर तथा भिडियो खिच्ने उद्देश्यका साथ डेढ लाख रुपियाँको क्यामरा खरिद गरेका बुढाले एक वर्षसम्म कतै केही काम नपाए पनि घोडाघोडी क्षेत्र वरदान भएको बताए ।

बुढाले घोडाघोडी घुम्न आउने पर्यटकको तस्बिर खिच्ने काम थालेको एक वर्ष भयो। उनी भन्छन् , “सुरुमा त अप्ठ्यारो लाग्यो , विस्तारै विस्तारै बानी बस्यो, राम्रो स्मार्टफोन, आइफोन भएकाले त हामीसँग तस्बिर खिचाउँदैनन् प्रायः सबै फोटो खिच्नुहुन्छ।”

घोडाघोडी ताल क्षेत्रमा घुम्न आउने पर्यटकको तस्बिर खिच्न थालेको केही समयमै बुढाले राम्रै कमाइ गरे। उनले त्यहीको कमाइले छ लाखको अर्को क्यामेरा किनेको बताए। बढी भिड हुने महिनामा ३० हजारदेखि ५० हजारसम्म तस्बिर खिचेर कमाउने गरेको बुढाको भनाइ छ।

बुढासँगै अहिले घोडाघोडी ताल क्षेत्रमा घुम्न आउने पर्यटकको तस्बिर खिच्ने आठ जना युवा सक्रिय छन्। तस्बिर खिचाउन चाहनेको चाहना अनुसार नै तस्बिर खिच्ने र तुरुन्त ह्वाट्सएपको माध्यमबाट मोबाइलमा पठाइने गरिएको उनीहरू बताउँछन्।

एउटा तस्बिरको बिस रुपियाँ लिने गरेका छन्। अर्का फोटोग्राफर विपीन बोहराले घोडाघोडीमा फोटो खिच्न थालेको छ महिना मात्र भयो। उनले एक महिनामा तिस हजार जति आम्दानी गरेको बताए। मेला पर्व, विशेष चाडपर्वमा घोडाघोडीमा भिडभाड लाग्ने गर्दछ। भिडभाडमा तस्बिर खिच्नेको सङ्ख्या पनि बढी हुने र कमाइ पनि राम्रो हुने बुढा र बोहराको अनुभव छ।

घोडाघोडीमा तस्बिर खिच्नेले अनुमति लिएर मात्र खिच्न पाइन्छ। स्थानीय घोडाघोडी सामुदायिक वनको अनुमतिमा आठ जनाभन्दा बढी नहुने गरेर तस्बिर खिच्ने अनुमति लिएको बुढाले बताए। उनीहरूले हरेक दिन ५० रुपियाँ सामुदायिक वनलाई तस्बिर खिचेबापतको शुल्क बुझाउने गरेको बताए। गोरखापत्र