प्रदेश प्रहरी प्रमुख बोहराको निर्देशन- ‘अराजक गतिविधिप्रति निर्मम बन्नु, सर्वसाधारणलाई दुःख नदिनू’

धनगढी । सुदूरपश्चिम प्रदेश प्रहरी प्रमुख प्रहरी नायब महानिरीक्षक भरत बहादुर बोहराले शान्ती–सुरक्षालाई थप चुस्त बनाउन निर्देशन दिएका छन् । बुधबार ईलाका प्रहरी कार्यालय त्रिभुवनबस्ती, बेलौरी, बेलडाँडी, झलारी र गुलरियाको अनुगमन गर्दै बोहराले यस्तो निर्देशन दिएका हुन् ।

निरिक्षणका क्रममा प्रदेश प्रहरी प्रमूख बोहराले नागरीकलाई सेवाको मुख्य केन्द्रमा राखी प्रहरी सेवा प्रवाह गर्न निर्देशन दिएका छन् । ‘हाम्रो उद्धेश्य भनेको नागरिकलाई चुस्त र दुरुस्त सेवा प्रदान गर्नु हो’, उनले भने, ‘त्यसैले यसतर्फ सबैजना सजग रहनुहोला । सेवाग्राहीलाई मुख्य केन्द्रमा राखेर मैत्रिपूर्ण रुपमा सेवा प्रवाह गर्नुहोला ।’

यस्तै उनले सिमावर्ति क्षेत्रमा हुने तस्करी, अराजक गतिविधि, लागुऔषध कारोबार नियन्त्रण गर्न र यस्ता गतिविधिप्रति निर्मम रुपमा प्रस्तुत हुनसमेत निर्देशन दिएका छन् ।

योसँगै राष्ट्रसेवक प्रहरीहरुलाई उच्च मनोबलका साथ कर्तव्यनिष्ठ भएर कार्य सम्पादन गर्नसमेत बोहराले निर्देशन दिएका छन् । निरिक्षणका क्रममा उनले लागु औषध मुद्दामा संलग्न हिरासत कक्षमा रहेका थुनुवाहरुलाईसमेत भेट गरी चेतनामुलक सन्देश दिएका थिए ।