धनगढी । स्थानीय तहको निर्वाचनबाट निर्वाचित भएका धनगढी २ का अध्यक्ष धर्मराज ओझा धेरैजसो समय फिल्डमा भेटिन्छन् ।
निर्वाचित भएसँगै जनताको हितका लागि काम थालेका वडा अध्यक्ष ओझा जनताका समस्या बुझ्न वाडाबासीका घरघरमा पुग्छन् । अहिले उनको दैनिकी कार्यालयमा भन्दा बढी फिल्डमा बित्नेगर्दछ ।
हरेक वर्ष डुबानको समस्या भोग्दै आएको धनगढीलाई यसवर्ष डुबानबाट जोगाउनका लागि अध्यक्ष ओझा आफै फिल्टमा खटेका छन् । जनताको समस्या बुझ्दै त्यसको हल खोज्ने कार्यका लागि आफू अधिकांश समय फिल्डमै बिताउने गरेको अध्यक्ष ओझा बताउँछन् ।
‘म जनताको सेवा गर्न आएको हुँ । जनताले मलाई पाँच वर्षका लागि योजना, काम र जिम्मेवारी दिएर चुनेका हुन्’, उनले भने, ‘अहिले म त्यही गर्दैैछु ।’
त्यस्तै अध्यक्ष ओझाले हरेक वर्षको डुबानको समस्याबाट जनतालाई राहत दिन यसवर्ष वर्षायाम सुरु हुनु अगावै नाला सफाईको काम थालेको ओझाको भनाई छ ।
‘नाला साँघुरो हुँदा र अत्यन्तै फोहोर हुँदा पानीले सहज रुपमा निकास नपाउने अवस्था थियो । अहिले हामीले त्यही नाला सफाई गर्ने र फराकिलो बनाउने काम थालेका छौँ’, उनले भने, ‘यो कार्यकापालिकाले नै निर्णय गरेको विषय हो । अहिले खोलानाला अतिक्रमण गरेर बनाइएका संरचना धमाधम हटाउँदै छौँ, स्थानीयको साथ राम्रैसँग मिलेको छ ।’
‘हाम्रो यो कार्यमा पाँच जनाको टिम छ, १–१ जना इन्जिनियर र सबइन्जिनियर र ३ जना अमिन, भत्काउने अख्तियारी इन्जिनियरले दिनुहुन्छ, नाप्ने विषय अमिनले हेर्नुहुन्छ भने सम्पूर्ण कामको निरिक्षण र निर्णय अध्यक्षको हैसियतले मैले गर्छु’, अध्यक्ष ओझाले भने, ‘टिमको सहकार्य र सक्रियता अनि स्थानीय वडाबासीको सहयोगले गर्दा काम एकदमै सहज ढंगमा अघि बढेको छ । भावी दिनमा पनि अझै सहज हुने अपेक्षा गरेको छु ।’
प्रतिक्रिया दिनुहोस्