धनगढी । नेपाल प्रिमियर लिग (एनपीएल)को पहिलो संस्करणको फाइनल खेल पुष ६ गते (शनिबार) हुँदैछ ।
फाइनलमा प्रवेश गरेका सुदूरपश्चिम रोयल्स र जनकपुर बोल्ट्सबीच शनिबार काठमाडौँ त्रिवि अन्तराष्ट्रिय क्रिकेट मैदानमा एनपीएल उपाधिका लागि भिडन्त हुनेछ ।
यसअघि दुई पटक सुदूरपश्चिम रोयल्ससँग हार व्यहोरिसकेको जनकपुर बोल्ट्स फाइनलमा फेरि सुदूरपश्चिम रोयल्ससँगै प्रतिस्पर्धा गर्ने भएपछि अहिले फाइनल खेलप्रतिको चासो झनै बढेको छ ।
अझ सामाजिक सञ्जालमा यी दुई टिममध्ये कसले बाजी मार्ला ? भन्दै तर्कवितर्कसमेत सुरु भइसकेको छ ।
एनपीएलको सुरुवातदेखि नै निकै जबरजस्त फ्यान फलोइङ्ग भएको सुदूरपश्चिमका फ्यानहरुले दुईपटक हारको सामाना गरिसकेको जनकपुर बोल्ट्सले पुनः तेस्रो पटक हारको सामना गर्नुपर्ने भन्दै प्रतिक्रिया दिइरहेका छन् ।
यता जनकपुरका फ्यानहरुले भने दुईपटक हार व्यहोरे पनि तेस्रो पटक भने जनकपुरसँग सुदूरपश्चिमले हार व्यहोर्नुपर्ने प्रतिक्रिया दिइरहेका छन् । फ्यानहरुबीचको प्रतिक्रियाले एनपीएलको फाइनल झनै रोमाञ्चक हुने पक्का छ ।
तर साच्चै एनपीएलको उपाधि कसले लैजाला ? भन्ने निर्क्यौल गर्न भने शनिबार नै पर्खनुपर्छ ।
प्रतिक्रिया दिनुहोस्