धनगढी : चर्चित कमेडी रियालिटी शो ‘कमेडी च्याम्पीयन २’ को उत्कृष्ट ४ मा पुुगेर चर्चित बनेका कञ्चनपुर शुक्लाफाँटा नगरपालिका–१ बन्साहाका हिक्मत महराको निधन भएको छ । मंगलबार साँझ कैलालीको गोदावरीमा मोटरसाइकल दुर्घटना हुँदा उनको निधन भएको हो ।
मंगलबार साँझ गोदावरी मन्दिर जाने बाटो नजिक म २ प ९११७ नम्बरको मोटरसाइकल अनियन्त्रित भएर दुर्घटना हुँदा हिक्मत महरा गम्भिर घाइते भएका थिए ।
उनको सेती प्रादेशिक अस्पताल धनगढीमा उपचारका क्रममा मृत्यु भएको सुदूरपश्चिम प्रदेश ट्राफिक प्रहरी कार्यालय अत्तरियाले जनाएको छ ।
‘कमेडी च्याम्पियन २’ मा हिक्मत ६ हजार प्रतियोगी सँगै डिजिटल अडिसन दिएर १ सय ८० जनामा छनोट भएका थिए । त्यसपछि उनी टप २४, १५, ११ हुँदै उत्कृष्ट चारमा पुगेका थिए । उत्कृष्ट ४ बाट भने उनी भोटको आधारमा बाहिरिएका थिए ।
कञ्चनपुरको सिद्धबैजनाथ माध्यमिक विद्यालय बन्साहाबाट प्लस टु र कृष्ण बैजनाथ बहुमुखी क्याम्पस झलारीमा बिएडसम्म अध्ययन गरेका हिक्मतले विद्यार्थी हुँदै गर्दा कमेडि देखाउँदै आएका थिए ।
उनका कमेडी विशेष गरेर समाजका विकृति, विसंगति र राजनीतिक परिदृश्यका बारेमा हुने गरेका थिए ।
गोदावरी पीङका सञ्चालन समेत रहेका उनी पछिल्लो समय कैलालीकाे गोदावरीमै अस्थाइ रुपमा बसोबास गर्दै आएका थिए ।
प्रतिक्रिया दिनुहोस्