काठमाडौँ : दक्षिण एशियाली फुटबल महासंघ (साफ) महिला च्याम्पियनशिपमा समूह चरणको अन्तिम खेलमा भुटानले माल्दिभ्सलाई १३-० को फराकिलो गोल अन्तरले पराजित गरेको छ।
त्रिपुरेश्वरस्थित दशरथ रंगशालामा आज (बिहीवार) भएको खेलमा भुटानका लागि देकी लाजोमले ५ गोल, पेमा छोदेन र डेकी याङदोनले २/२ गोल तथा नामगेल देमा, देकी याङदोन, छिरिङ लादेन र सोनाम छोदेनले १/१ गोल गरे।
देकी लाजोमले १५, १९, ४६, ५२ र ७०औँ मिनेटमा गोल गरिन्। पेमाले ७, १७, छिरिङ याङदेनले ६५, ८०, सोनमले ५, नामगेलले ४१, देकी याङदेनले ४७ तथा छिरिङ लादेनले ६८औँ मिनेटमा गोल थपे।
जितसँगै भुटान ३ खेलबाट ७ अंक जोडेर समूह ‘बी’ को शीर्षमा उक्लिएको छ। सेमिफाइनलमा स्थान सुरक्षित गरेको भुटानको गोल अन्तर १६ भएको छ। यो समूहमा २ खेल खेलेको नेपालले ४ अंक र श्रीलंकाले २ खेल खेलेर ३ अंक जोडेको छ। अब नेपालले समूह विजेता बन्न श्रीलंकालाई ६ गोल अन्तरले पराजित गर्नुपर्ने हुन्छ।
प्रतिक्रिया दिनुहोस्