धनगढीमा तिव्र गतिमा सवारी चलाउँदै हुनुहुन्छ ? होसियार ! कारवाहीमा परिन्छ है….

धनगढी । धनगढीमा तिव्र गतिमा सवारी चलाउनेमाथि कडाई गरिएको छ । पछिल्लो समय तिव्र गतिका कारण सवारी दुर्घटनाका घटना बढ्न थालेपछि तिव्र गतिमा सवारी चलाउनेमाथि कडाई गरिएको हो ।

सडक दुर्घटनाका घटनालाई शुन्यमा झार्ने उद्धेश्य अनुसार धनगढीमा तिव्र गतिमा सवारी चलाउनेमाथि कडाई गरिएको जिल्ला ट्राफिक प्रहरी कार्यालय कैलालीका इन्चार्ज तथा ट्राफिक प्रहरी निरीक्षक विरेन्द्र जोहारीले बताएका छन् । ‘हामी अहिले जिल्लाभर सडक दुर्घटना कम गर्ने उद्धेश्यमा अघि बढी रहेका छौँ’, उनले भने, ‘धेरैजसो दुर्घटना तिव्र गतिकै कारण भएको पाइएपछि यसमा कडाई गरेका हौँ ।’

खासगरी मोहोना अत्तरिया ६ लेन सडकमा ट्राफिक प्रहरीले तिव्र गतिमा सवारी चलाउनमाथि निगरानी बढाएको छ । मोहना अत्तरिया ६ लेन सडकमा प्रतिघण्टा ६० को स्पिडमा सवारी चलाउन पाईदैन । तर, सो भन्दा तिव्र गतिमा सवारी चलाए कार्वाही गरिने ट्राफिक प्रहरी निरीक्षक जोहारीले बताएका छन् ।

हाल तिव्र गति मापनका लागि दिनहूँ रुपमा मोहना अत्तरिया ६ लेन सडकखण्डमा गती मापन नियम उल्लंघन गर्नेलाई कार्वाहीको दायरामा ल्याएको प्रहरी निरीक्षक जोहारीले बताए । ‘हामी हरेक दिन मोहोना अत्तरिया ६ लेन सडकमा गति मापन मेसिनद्धारा जाँच गर्छौं’, उनले भने, ‘तिव्र गतिमा सवारी चलाएको पाइए जरिवानाका साथै २ घण्टा अनिवार्य ट्राफिक नियमबारे प्रशिक्षण दिने गरेका छौँ ।’

त्यस्तै, उनले उक्त अभियानलाई निरन्तरता दिने प्रतिवद्धता समेत गरेका छन् ।