माओवादी केन्द्रीय कमिटी बैठकको तेस्रो दिन : नेतृत्वको कार्यशैलीको आलोचना

काठमाडौं: नेकपा माओवादी केन्द्रको केन्द्रीय कमिटी बैठक तेस्रो दिन पनि चलिरहेको छ । काठमाडौंको कमलादीस्थित प्रज्ञा प्रतिष्ठानको सभाहलमा शुक्रवार तेस्रो दिनको बैठक बसिरहेको हो ।

बैठकमा अध्यक्ष पुष्पकमल दाहाल प्रचण्डको राजनीतिक प्रतिवेदनमाथि छलफल चलिरहेको छ । बिहीवारसम्म ७४ जना सदस्यले धारणा राखेको र आज पनि सदस्यहरूले बोल्ने क्रम चलिरहेको भएको केन्द्रीय सदस्य रामकुमार शर्माले जानकारी दिए ।

बैठकमा नेताहरूले पार्टी नेतृत्वको कार्यशैलीप्रति विरोध जनाएका छन् । छोरीलाई स्वकीय सचिव बनाएको, पार्टीमा योगदान नभएका ज्वाइँ जीवन आचार्यलाई कोशी प्रदेश सरकारमा मन्त्री बनाएको भन्दै केन्द्रीय सदस्यहरूले प्रचण्डको आलोचना गरेका थिए ।

तेस्रो दिनको बैठकमा बोल्ने सदस्यहरूले पनि पार्टीको अस्तित्व रक्षाका लागि शुद्धिकरण अभियान चलाउनु पर्ने बताएका छन् ।
साउन २१ गते आइतवार बैठक समापन गर्नेगरी तयारी भएको माओवादीले जनाएको छ । २०७८ मा महाधिवेशन भएपछि माओवादीको केन्द्रीय समिति पहिलो पटक बसेको हो ।

तेस्रो दिनसम्म प्रचण्डको राजनीतिक र सांगठनिक प्रतिवेदन सदस्यहरूलाई भने बाँडिएको छैन ।