जग्गाको स्वामित्व नपाउँदा विमानस्थल निर्माणमा अल्झन

कञ्चनपुर । महेन्द्रनगरस्थित मझगाउँ विमानस्थललाई जग्गाको स्वामित्व प्राप्त हुन नसक्दा निमार्णको काम प्रभावित भएको छ । विमानस्थलको दक्षिणतर्फ रत्न वाटिका र शुक्लाफाँटा राष्ट्रिय निकुञ्ज सुरक्षार्थ नेपाली सेना मातहतको जमिन विमानस्थललाई उपलब्ध नहँुदा निर्माणको काम प्रभावित बनेको हो ।

विमानस्थलको आफ्नो नाममा भएको जग्गामा निर्माण कार्य सम्पन्न भएको र थप काम गर्ने जग्गाको स्वामित्व प्राप्त नहुँदा काम रोकिने विमानस्थल आयोजना प्रमुख मीनराज ओझाले बताएका छन् । ‘सेनाले भोगचलन गरिरहेको जग्गा विमानस्थलको नाममा आएको छैन’, उनले भने, ‘अहिले विमानस्थलको नाममा भएको जग्गामा काम सकिएको छ ।’ ओझाका अनुसार नेपाली सेनाले भोगचलन गरिरहेको जमिनको भोगाधिकारका लागि मन्त्रालयमा प्रक्रिया अघि बढे पनि टुङ्गो लाग्न भने सकेको छैन ।

‘अहिले विमानस्थलको १५ प्रतिशत काम सम्पन्न भइसकेको छ’, उनले भने, ‘जग्गाको भोगाधिकारका लागि यहाँका जनप्रतिनिधि खटिनुभएको छ, आशा छ छिट्टै हुन्छ होला ।’ अहिले पनि जग्गाको स्वामित्वका लागि फाइल मन्त्रालयमा प्रक्रियामै रहेको र मन्त्रिपरिषद्बाट निर्णय हुन बाँकी रहेको ओझाले बताए । सेनाको मातहतमा रहेको जग्गा विमानस्थललाई दिने यसअघि सहमति भएको थियो । उनका अनुसार राजपत्रमा उक्त जग्गा विमानस्थलका लागि छोडिएको उल्लेख भए पनि लालपुर्जा सेनाका नाममा छ ।

शुक्लाफाँटा राष्ट्रिय निकुञ्जका प्रमुख संरक्षण अधिकृत किशोर मेहताले मन्त्रिपरिषद्को निर्णयबिना रुख कटान गर्न नसकिने बताए । ‘मन्त्रिपरिषद्ले निर्णय गरेपछि मात्रै हाम्रो रुख काट्ने पक्रिया सुरु हुन्छ’, उनले भने, ‘सरकारले निर्णय गरेपछि कुनै अवरोध हुँदैन ।’

विमानस्थलको काम प्रभावित बनेपछि यहाँको भीमदत्त नगरपालिकाका प्रमुख पदम बोगटीले स्थलगत निरीक्षण गरेर जग्गाको भोगाधिकार र रुख कटानीका लागि केन्द्र सरकारसँग पहल गर्ने बताउनुभएको छ । भीमदत्त नगरपालिकाको १५, दोधारा चाँदनी नगरपालिकाको १०, सुदूरपश्चिम प्रदेश सरकारको २५ र नागरिक उड्डयन प्राधिकरणको ५० प्रतिशत गरी तीनै तहको साझेदारीमा विमानस्थल निर्माण भइरहेको छ । तीन वर्षभित्र निर्माण सक्ने गरी कान्छाराम÷केएस÷उमा एन्ड कम्पनीसँग रु ४५ करोड ६६ लाखमा निर्माणको सम्झौता भएको छ ।

पहिलो चरणमा धावनमार्गसँगै ट्याक्सी वे, एप्रोनलगायतको काम हुनेछ । दोस्रो चरणमा टर्मिनल भवनदेखि पहुँचमार्ग निर्माण गरिने आयोजनाले जनाएको छ । विसं २०३४ देखि २०५७ सालसम्म सञ्चालनमा रहेको उक्त विमानस्थल पछि बन्द गरिएको थियो ।