शंकराचार्य आज नेपाल आउँदै

काठमाडौं – भारतको उडिसा जगन्नाथपुरीस्थित गाेवर्द्धन मठका शंकराचार्य निश्चलानन्द सरस्वती बिहीबार काठमाडौं आउदै छन् । उनी शिवरात्री पर्वको मूख्य अतिथिको रुपमा नेपाल आउन लागेका हुन् । दश सदस्यीय टोलीसहित आउने शंकराचार्यले तीन दिने लिङ्गपुराण, वेदपुराण, वेद, संस्कृत आचरण, वैदिक गणितबारे प्रवचन तथा व्याख्यात्मक प्रवचन दिने पशुपति क्षेत्र विकास कोषले जनाएको छ ।

कोषले महाशिवरात्रिको अघिल्लो दिन अर्थात भोलि शुक्रबारदेखि शिवरात्रिको भोलिपल्टसम्म पशुपतिमा शंकराचार्य पूजन महोत्सव कार्यक्रम आयोजना गर्ने भएको छ । हिन्दु धर्मका सर्वोच्च व्याख्याता एवं संरक्षक मानिने चार शंकराचार्य मध्ये गाेवर्द्धन मठका शंकराचार्य निश्चलानन्द सरस्वती सबैभन्दा वरिष्ठ हुन् । उनी जगतगुरू शंकराचार्यका १४५ औं उत्तराधिकारी हुन् । यसैबीच, पशुपति क्षेत्र विकास कोषले यस पटकको महाशिवरात्रिमा करिब २० लाख दर्शनार्थीले पशुपतिनाथको दर्शन गर्ने अनुमान गरेको छ ।

सोही अनुसार महाशिवरात्रीको व्यवस्थापन गरिएको कोषले जनाएको छ । यस पटक महाशिवरात्रिका दिन ५० जना भक्तजनलाई मात्रै विशेष पूजाको अनुमति दिइने भएको छ ।