सरकारले निजी क्षेत्रका प्रतिनिधिलाई अपराधी सरह व्यवहार गरिरहेको छः गगन

काठमाडौं । नेपाली कांग्रेसका सभापति गगनकुमार थापाले सरकारले निजी क्षेत्रका प्रतिनिधिलाई अपराधी सरह व्यवहार गरिरहेको आरोप लगाएका छन् ।

आइतबार पार्टी केन्द्रीय कार्यालय सानेपामा आयोजित कार्यक्रममा बोल्दै उनले यस्तो आरोप लगाएका हुन् ।

आर्थिक अपराधविरुद्ध सरकारले कानूनी ढंगले अघि बढाएको कारबाही प्रक्रियामा पार्टीको पूर्ण समर्थन भए पनि निजी क्षेत्रका प्रतिनिधि सबैलाई ठग जस्तो व्यवहार गरिएको भन्दै उनले आपत्ति जनाए ।

सुशासन र आर्थिक अपराधमा संलग्नलाई कारबाही गर्दा कांग्रेसले व्यक्ति, नेता वा नातागोता नहेरी सरकारलाई समर्थन गर्ने कुरा उनले स्पष्ट पारे । तर सरकारले अपनाएको कार्यशैलीका कारण निजी क्षेत्र त्रसित बनेको उनको आरोप छ । निर्माण व्यवसायी, बैंकर लगायत निजी क्षेत्रमा कार्यरत व्यक्तिलाई ठगीको दृष्टिले हेर्ने भाष्य निर्माण गरिएको भन्दै उनले यस्तो प्रवृत्तिले मुलुकको लगानी र उद्यमशीलतामा नकारात्मक असर पारेको टिप्पणी गरे ।

‘सरकारले जसरी आर्थिक अपराधमा कारबाही सुरु गरेको छ, यसमा हाम्रो समर्थन छ । कानूनले चिनेको जुनसुकै कार्यमा हाम्रो साथ र समर्थन रहन्छ । यसमा हामी नेता, नाता हेर्दैनौँ । तर यसले जसरी व्यवहार बनाएको छ नि, निजी क्षेत्रमा काम गरेको मान्छे भनेपछि के भाष्य बनाएको छ भने यो ठग हो, यसलाई मैले थुन्ने हो, यसलाई मैले बाँध्ने हो; चाहे त्यो निर्माण व्यवसायी होस् कि बैंकर होस् । अहिले व्यापक भयको वातावरण बनाएको छ । सबै जना त्रसेका छन्, सबैको सातो गएको छ,’ उनले भने ।

मुलुकमा भयको वातावरण सिर्जना भएकै कारण नयाँ व्यवसायहरू सुरु गर्न कोही पनि तयार नरहेको उनले बताए ।

‘मलाई के लागिरहेको छ भन्दा कोही पनि नयाँ व्यवसाय सुरु गर्नेवाला छैन । अहिले हामीले केही नयाँ होटलहरू खुलिरहेको देखिरहेका छौँ, यी लामो समयदेखि प्रक्रियामा रहेका कुराहरू हुन् । म त यो होस् भन्ने चाहन्छु । अहिले २० हजार छुट पाएको मान्छेले ३० हजारभन्दा बढी खर्च गर्नुपरेको छ,’ उनले भने, ‘ अहिले न्यून, मध्यम, पूँजी परिचालन गर्न सक्ने क्षमता भएको मान्छे कसैमा पनि कन्फिडेन्सको वातावरण बन्न सकिरहेको छैन । यसमा सरकारको कुनै चिन्ता पनि छैन । यदि सरकारमा यही प्रवृत्ति स्थायी भएर जाने हो भने अर्को पाँच वर्षमा हामीले धेरै थोक गुमाउनुपर्ने अवस्था आउन सक्छ ।’