कञ्चनपुरमा आगलागी हुँदा पाँच लाख बराबरको धनमाल नष्ट

कञ्चनपुर: कञ्चनपुरको भीमदत्त नगरपालिका–१० तिल्केनीमा आगलागी हुँदा करिब ५ लाख रुपैयाँ बराबरको धनमाल नष्ट भएको छ।

स्थानीय ४५ वर्षीय कृष्ण खत्रीको घर नजिकै रहेको उनको बाख्राको कच्ची गोठमा शनिबार दिउँसो अचानक आगलागी भएको प्रहरीले जनाएको छ। आगलागीबाट उक्त गोठ पूर्णरूपमा जलेर नष्ट हुनुका साथै गोठ नजिकै राखिएको मोटरसाइकल एक थान, चम्पा ट्रेक्टर एक थान तथा अन्य सामग्रीहरू समेत जलेर नष्ट भएको छ।

आगलागीबाट अन्दाजी ५ लाख रुपैयाँ बराबरको क्षति भएको प्रारम्भिक अनुमान गरिएको छ। स्थानीयवासी र प्रहरीको सहयोगमा आगो नियन्त्रणमा लिइएको प्रहरीले जनाएको छ।

घटनाबारे थप अनुसन्धान भइरहेको प्रहरीले जानकारी दिएको छ।