धनगढी – धनगढी उपमहानगरपालिका वडा नम्बर ५ ले आर्थिक वर्ष २०८१/८२ को वार्षिक कार्यक्रमअन्तर्गत महिला उद्दमशील कार्यक्रम सञ्चालन गरेको छ। कार्यक्रमअन्तर्गत वडा भित्रका विभिन्न टोलका महिलालाई दुना–टप्परी उत्पादनका मेसिन सामग्री हस्तान्तरण गरिएको छ।
वडाका भगवती टोल, जाइ गौरीशंकर टोल, शान्तिटोल, तारानगर र शिवशक्तिटोलका महिला समूहको मागअनुसार चारवटा दुना–टप्परी बनाउने मेसिन वितरण गरिएको वडा कार्यालयले जानकारी दिएको छ।
वडा अध्यक्ष गजेन्द्र शाहीले यस्ता पहलले महिलाहरूको आर्थिक सबलीकरणमा महत्वपूर्ण योगदान पुग्ने विश्वास व्यक्त गरे। अध्यक्ष शाहीले भने, “वडाभित्रका महिला दिदीबहिनीहरूले आत्मनिर्भर हुन र आम्दानीका स्रोत बढाउन यो कार्यक्रम ल्याइएको हो। आगामी दिनमा पनि वडावासीहरूको माग र आवश्यकताका आधारमा स्वरोजगार र आयआर्जनका कार्यक्रमहरू निरन्तर सञ्चालन गरिनेछ।”
स्थानीय महिला समूहका प्रतिनिधिहरूले उपकरण प्राप्त भएपछि आभार व्यक्त गर्दै उत्पादन र बजारीकरणसम्बन्धी तालिम तथा सहजीकरणको माग समेत गरेका छन्। वडा कार्यालयका अनुसार आवश्यक तालिम र सहयोगका पहल चाँडै अगाडि बढाइनेछ।
प्रतिक्रिया दिनुहोस्