काठमाडौं : युक्रेन युद्ध अन्त्यका लागि रुसी नेता भ्लादिमिर पुटिनसँग भएको फोनवार्तामा कुनै प्रगति नभएको अमेरिकी राष्ट्रपति डोनाल्ड ट्रम्पले बताएका छन्।
वासिङ्टनले किभमा केही हतियार ढुवानी रोकेपछि युक्रेनमा तीन वर्षभन्दा बढी समयदेखि जारी द्वन्द्व अन्त्यका लागि अमेरिकी नेतृत्वको शान्ति वार्ता रोकिएको ट्रम्पको गम्भीर अनुमान आएको हो।
‘हामी (पुटिन र अमेरिकी राष्ट्रपति ट्रम्प) ले धेरै लामो फोन संवाद गरेका छौं। यो साँच्चै नै लामो कल थियो। फोनवार्तामा हामीले इरानसहित धेरै विषयमा कुरा गर्यौं र हामीले युक्रेनसँगको युद्धको बारेमा पनि कुरा गर्यौं। म छलफलबाट खुसी छैन,’ राष्ट्रपति ट्रम्पले पत्रकार सम्मेलनमा बताए।
युद्ध अन्त्यका लागि कुनै सम्झौताको नजिक पुगेको छ कि भनेर सोधिएको प्रश्नको जवाफमा ट्रम्पले भने, ‘अहँ, मैले उनसँगको वार्तामा युक्रेन युद्धबारे कुनै प्रगति भएको महसुस गर्न सकिन।’
अमेरिकी रिपब्लिकन नेता ट्रम्पको यो संवादप्रतिको दृष्टिकोण असामान्य रूपमा निराशाजनक देखिएको छ। जनवरीमा सत्तामा फर्केपछि पुटिनसँग यसअघि भएका पाँच वटा वार्तापछि उनले सम्झौताको दिशामा प्रगतिको आशा देखिएको बताएका थिए।
रुसी नेता पुटिनप्रति सुरुको दृष्टिकोण राखेपछि उनले युद्ध अन्त्यका लागि रूसी नेताको धारणाप्रति निराशा व्यक्त गरे। हालैका हप्तामा उनले इरान–इजरायल द्वन्द्वमा मध्यस्थता गर्ने पुटिनको प्रस्तावलाई अस्वीकार गरेका थिए भने पुटिनलाई युक्रेन युद्धमा ध्यान केन्द्रित गर्न सुझाएका थिए।
उक्त वार्ता करिब एक घण्टासम्म चलेको र पुटिनले रुसको लक्ष्यलाई नछोड्ने दृढता व्यक्त गरेको मस्कोबाट क्रेमलिन स्रोतले दिएको जानकारीमा उल्लेख छ।
क्रेमलिनका सहयोगी युरी उशाकोभले भने, ‘हाम्रा राष्ट्रपतिले रुसले तय गरेको लक्ष्य हासिल गर्ने बताएका छन्। रुसले यी लक्ष्य त्याग्ने छैन।’
मस्कोले लामो समयदेखि युक्रेनमा आफ्नो अधिकतमवादी उद्देश्यलाई द्वन्द्वको ‘मूल कारण’बाट छुटकारा पाउनका लागि भएको बताउँदै आएको छ, तर, किभले उसको नाटोको सदस्यता प्राप्त गर्ने महत्वाकांक्षालाई त्याग्न माग गर्दै आएको छ।
डेनमार्कमा जेलेन्स्की
युक्रेनमा मस्कोले सन् २०२२ को फेब्रुअरीमा आक्रमण गरेयता लाखौं मानिसको ज्यान लिइसकेको छ र अहिले रुसले पूर्वी र दक्षिणी युक्रेनको ठूलो भूभागमा नियन्त्रण जमाएको छ।
पुटिनले ट्रम्पसँग युक्रेनमा शान्ति स्थापनाका लागि युद्धविराम गर्ने विषयमा मस्कोले वार्तालाई निरन्तरता दिने बताएका छन्।
उशाकोभले भने, ‘उनले वार्ता प्रक्रियालाई निरन्तरता दिन रुसी पक्ष तयार रहेको पनि बताए। हामी द्वन्द्वको राजनीतिक संवाद र वार्ताबाट समाधान खोजिरहेका छौं।’ मस्कोले महिनौँदेखि युक्रेनमा अमेरिकाले प्रस्ताव गरेको युद्धविराममा सहमत हुन अस्वीकार गर्दै आएको छ।
किभ र उसका पश्चिमी सहयोगीहरूले पुटिनले युक्रेनमा रुसको प्रगतिलाई अगाडि बढाउने क्रममा प्रक्रियालाई बाहिर निकालेको आरोप लगाउँदै आएका छन्।
रुसको सहयोगी इरानमा अमेरिकाले आणविक आक्रमण गरेपछि पुटिनले मध्यपूर्वका सबै द्वन्द्व ‘कूटनीतिक तवरले’ समाधान गरिनुपर्नेमा ट्रम्पसँगको वार्तामा ‘जोड’ दिएको क्रेमलिनले जनाएको छ।
वासिङ्टनले पश्चिमी सैन्य सहयोगमा निर्भर रहेको किभलाई झट्का दिँदै केही हतियार ढुवानी रोक्ने निर्णय गरेको केही दिनपछि यो कुराकानी भएको हो।
युक्रेनमा बिहीबार भएको रुसी आक्रमणमा परी कम्तीमा आठ जनाको मृत्यु भएको किभले जनाएको छ। युक्रेनका राष्ट्रपति भोलोदिमिर जेलेन्स्कीले युरोपेली सङ्घ (इयू) का शीर्ष अधिकारीसँग भेटवार्ता गरेका छन्।
जेलेन्स्कीले डेनमार्कमा युरोपेली सङ्घका सहयोगीहरूलाई अमेरिकी सैन्य सहायताको बारेमा उठेको शङ्काले ब्रसेल्स र नेटोसँग अझ बढी सहयोगको आवश्यकतालाई बलियो बनाएको बताए। उनले किभले ट्रम्पको ‘बिनाशर्त युद्धविराम’लाई सधैँ समर्थन गरेको पनि बताए।
युक्रेनका एक वरिष्ठ अधिकारीले एएफपीलाई बताएअनुसार ट्रम्प र जेलेन्स्कीले शुक्रबार एकअर्कासँग कुरा गर्ने योजना बनाएका थिए। बुधबार किभले ह्वाइट हाउस र पेन्टागनले केही हतियार ढुवानी रोकेपछि त्यसको असरबारे वासिङ्टनसँग स्पष्ट पार्न खोजेका थिए।
जेलेन्स्कीले भने, ‘युक्रेन, हाम्रो रक्षा र हाम्रा जनताका लागि अमेरिकाको निरन्तर समर्थन हाम्रो साझा हितमा छ।’ रूसले पश्चिमी देशहरूलाई किभमा हतियार नपठाउन निरन्तर आग्रह गर्दै आएको छ।
प्रतिक्रिया दिनुहोस्