मोटरसाइकलको ठक्करबाट घाइते भएकी हरुसाउँदको मृत्यु

बैतडी : मोटरसाइकलले ठक्कर दिँदा गम्भीर घाइते भएकी बैतडीकी ३० बर्षीया हरु साउँदको मृत्यु भएको छ । शिवनाथ गाउँपालिका–४ कुङेफाँटा घर भएकी साउँदलाई कैलालीको अत्तरीयमा वैशाख २३ गते मोटरसाइकलले ठक्कर दिएको थियो । मोटरसाइकलको ठक्करबाट गम्भीर घाइते भएकी साउँदको उपचारका क्रममा मायामेट्रो अस्पताल धनगढीमा मृत्यु भएको स्थानीय दशरथ चाडले बताए ।

बच्चाहरुलाई पढाउनका लागि यही वैशाख २३ गते घरबाट अत्तरीया गएकी साउँदलाई सोही दिन साँझ मोटरसाइकलले ठक्कर दिएको थियो । मृतक साउँदका दुई छोरा रहेका छन् । मृतक साउँदका श्रीमान हिक्मत साउँद रोजगारीको सिलसिलामा साउदी अरबमा रहेका र आइतबार मात्रै नेपाल आइपुगेका चाडले बताए ।

साउँदलाई ठक्कर दिने मोटरसाइकल चालकलाई प्रहरीले सोही दिन नियन्त्रणमा लिएको थियो । बालबच्चा पढाउनका लागि अत्तरीया पुगेकी साउँदको निधन भएपछि घरपरिवारको विचल्ली भएको छ ।