धनगढी : रसुवामा आएको बाढीमा परेर कैलालीका केही व्यक्ति सम्पर्कविहीन भएका छन् । उनीहरु रोजगारीका क्रममा त्यहाँ रहेका थिए । रसुवास्थित धुन्चे हाईड्रो पावरमा कार्यरत टीकापुर नगरपालिका-१ समितिपुरका मात्रै ८-१० जना सम्पर्कविहीन छन् । उनीहरुसंग सम्पर्क हुन नसकेको आफन्तले बताएका छन् ।
सो हाईड्रो पावरमा कार्यरत मानबहादुर चौधरीका भाई अखिल चौधरीले दाईसँग सम्पर्क हुन नसकेको बताए । ‘सबैजनाको मोबाइल अफ छ,’ उनले भने, ‘कसैसँग पनि सम्पर्क हुन सकेको छैन ।’
सम्पर्कविहीन चौधरी असार ३० गते रोजगारीका लागि त्यहाँ गएको बताइएको छ । टीकापुर नगरपालिकाका अन्य ठाउँबाट समेत धेरै व्यक्तिहरु रसुवाका विभिन्न हाईड्रो पावर लगायतमा कार्यरत रहेको बुझिएको छ । तीमध्ये केही व्यक्तिहरु भने सम्पर्कमा आएका छन् ।
प्रतिक्रिया दिनुहोस्