धनगढीमा खानेपानी संकट, स्याउलेमा दमकल र ट्यांकरबाट पानी वितरण

धनगढी । मनसुन सक्रिय नहुँदा कैलालीलगायतका क्षेत्रमा खडेरी लम्बिँदै गएपछि भूमिगत पानीको सतह तीव्र रूपमा घट्न थालेको छ । पानीको सतह घटेसँगै धनगढीका अधिकांश हातेपम्प सुकेका छन् भने खानेपानी र सिँचाइ दुवै क्षेत्रमा संकट देखिएको छ ।

भूमिगत जलस्रोत तथा सिंचाई विकास डिभिजन कैलालीका अनुसार भूमिगत पानीको अत्यधिक दोहन, वन फडानी, चुरे९भावर क्षेत्रमा नदीजन्य पदार्थको अत्यधिक उत्खन, कंक्रिट भवन र कालोपत्रे सडकका कारण जमिनमा पानी पुनर्भरण हुन नपाउँदा धनगढी क्षेत्रमा पानीको सतह लगातार घट्दै गएको हो ।

खानेपानी आपूर्तिमा समस्या
खानेपानी संस्थान, धनगढीले पछिल्ला दिनमा धनगढीमा भूमिगत पानीको सतह २ मिटरसम्म घटेको जनाएको छ । संस्थानले २१ मिटर गहिरो १२ वटा बोरिङबाट दैनिक १७ लाख लिटर पानी वितरण गर्दै आएको भए पनि अहिले पानीको सतह घटेकाले आपूर्ति व्यवस्थापनमा समस्या भएको छ ।

किसानको रोपाइँ रोकियो
जमिनमुनिको पानी घटेसँगै किसानले सिँचाइ अभावमा धान रोप्न सकेका छैनन् । बारीमा लगाएको तरकारी पनि सुकेको छ। २४ सै घण्टा पानी आउने धारा, चापाकल र बोरिङमा कहीँ पानी आएको छैन भने कहीँ मुस्किलले आइरहेको छ ।

धनगढी १४ स्याउले बजारका धर्मराज पडालले पहिले ५०-६० फिटमै पानी आउने चापाकल अहिले २०० फिटसम्म गाड्दा पनि पानी नआउने गरेको बताए । ‘खानेपानी जुटाउनै समस्या भइरहेको छ । छरछिमेकीबाट गर्जो टार्नुपरेको छु पडालले भने ।’

स्याउलेमा दमकल र ट्यांकरमार्फत पानी वितरण
स्याउले बजार क्षेत्रका नलका तथा धारा पूर्ण रूपमा सुकेपछि धनगढी उपमहानगरपालिकाले दमकल र पानी ट्यांकरमार्फत पानी वितरण सुरु गरेको छ । वडा नं। १४ का अध्यक्ष मानबहादुर बिष्टसँगको छलफलपछि मंगलबारदेखि वन कार्यालय अगाडि डिप बोरिङ्ग नलका जडानको काम पनि सुरु गरिएको छ । बर्खा नलाग्दासम्म ट्यांकरबाट दैनिक प्रयोजनको पानी उपलब्ध गराइने उपमहानगरले जनाएको छ ।

पुनर्भरणका लागि उपमहानगरको अभियान
धनगढी उपमहानगरपालिकाले भूमिगत पानी पुनर्भरणका लागि वृक्षारोपण, प्राकृतिक ताल९तलैयाको अतिक्रमण हटाएर संरक्षण, नदी९नाला संरक्षण अभियान र नयाँ भवनमा सोकपिट अनिवार्य गर्ने अभियान चलाएको छ ।