कैलाली र कञ्चनपुरका विभिन्न स्थानबाट प्रहरीले भन्सार छली गरी भारतबाट ल्याइएका लाखौँ रुपैयाँ बराबरका सामान बरामद गरेको छ।
कैलालीतर्फ धनगढी उपमहानगरपालिका–२ डोके बजार, भजनी नगरपालिका–३ काँडा र वडा नम्बर ५ हलौना घाट क्षेत्रबाट करिब १ लाख ६ हजार ५२० रुपैयाँ बराबरका सामान बरामद गरिएको जिल्ला प्रहरी कार्यालय कैलालीले जनाएको छ। बरामद गरिएका सामग्रीमा चिनी, गुड, पेय पदार्थ, खाने तेल, पान मसला, बिडी, मैदा, जिरा र साबुन लगायतका सामग्री रहेका छन्।
प्रहरीका अनुसार ती सामान गस्तीका क्रममा बेवारिसे अवस्थामा फेला परेका थिए। आवश्यक प्रक्रिया पूरा गरी सामान नियन्त्रणमा लिइएको छ।
यसैगरी, कञ्चनपुरतर्फ भीमदत्त नगरपालिका–४ र ६ नम्बर वडाबाट करिब ४ लाख ४९ हजार ९ सय रुपैयाँ बराबरका सामान बरामद गरिएको छ। बरामद सामग्रीमा जुत्ता, पेचकिला, धार्मिक सामग्री र एक थान मोटरसाइकल समेत रहेको प्रहरीले जनाएको छ।
जिल्ला प्रहरी कार्यालय कञ्चनपुरबाट खटिएको टोलीले ती सामान बेवारिसे अवस्थामा फेला पारी आवश्यक कारबाहीका लागि गड्डाचौकी भन्सार कार्यालयमा बुझाएको जनाएको छ।
प्रतिक्रिया दिनुहोस्