धनगढी/सीमा समाचार: भारत–नेपाल सीमा क्षेत्र गौरीफन्टा नाकामा अवैध तस्करीका घटनाहरू पछिल्ला दिनहरूमा तीव्र रूपमा बढ्दै गएको देखिएको छ। सानो मात्राको सामान ओसारपसारदेखि ठूलो परिमाणमा हुने तस्करीसम्म सक्रिय हुन थालेपछि सीमा सुरक्षा निकायमाथि थप दबाब परेको बताइन्छ।
सोमबार साँझ गौरीफन्टा प्रहरीले सञ्चालन गरेको चेकजाँच अभियानका क्रममा एक नेपाली महिला ठूलो परिमाणमा कपडा तस्करी गर्दै गरेको अवस्थामा पक्राउ परेकी छन्। जंगल क्षेत्र नजिक पुलमुनि शंकास्पद गतिविधि देखिएपछि गरिएको जाँचका क्रममा ती महिलाले सन्तोषजनक जवाफ दिन नसकेको प्रहरीले जनाएको छ।
झोलाको खानतलासी गर्दा पाँच वटा प्लास्टिक बोरामा १५९ थान लेडिज सुट, ११ थान साडी र १२ थान फ्रक फेला परेको थियो। करिब ९५ हजार भारतीय रुपैयाँ बराबरको उक्त सामान वैध कागजातविहीन रहेको पाइएपछि जफत गरी भन्सार कार्यालयमा बुझाइएको छ। पक्राउ पर्ने महिला कैलाली गोदावरी–१ की विष्णा भट्ट रहेको जनाइएको छ।
त्यसैगरी, केही दिनअघि दिल्लीबाट धनगढीतर्फ आउँदै गरेको नेपाली नम्बर प्लेटको पर्यटक बसमा लुकाइछिपाइ ल्याइएका हार्डवेयर तथा मेसिनरी पार्ट्स पनि कस्टम कार्यालयले बरामद गरेको छ। उक्त सामानको मूल्य एक लाख रुपैयाँभन्दा बढी रहेको बताइएको छ।
अर्को घटनामा, जेठ ५ गते गौरीफन्टा नाका क्षेत्रमा भारतीय रुपैयाँ ५८ हजार बराबरको तस्करी सामानसहित दुई नेपाली महिला पक्राउ परेका थिए। पक्राउ पर्नेमा धनगढी–२ की भावना चौधरी र पुष्पा भट्ट रहेका छन्।
सीमा क्षेत्रमा यस्ता घटनाहरू निरन्तर बढ्दै जाँदा गौरीफन्टा नाका तस्करीको प्रमुख मार्ग बन्दै गएको स्थानीयको भनाइ छ। सुरक्षा व्यवस्थामा कमजोरीका कारण तस्कर समूहहरू सक्रिय भएको आरोप समेत लाग्दै आएको छ।
स्रोतहरूका अनुसार कैलाली जिल्लाका विभिन्न सीमावर्ती क्षेत्रमा समेत तस्करी गतिविधि फैलिँदै गएको छ। स्थानीयले प्रहरी र तस्करबीच मिलोमतो हुने गरेको गुनासो समेत गर्दै आएका छन्।
प्रतिक्रिया दिनुहोस्