धनगढी – धनगढी उप-महानगरपालिका-६ मटियारीमा खानेपानीको समस्या झन् गम्भीर बन्दै गएको छ। बिहानपख धाराबाट आएको पानी नै हिलो, लेदो र माटो मिसिएको अवस्थामा आएपछि स्थानीयवासी आक्रोशित भएका छन्। दैनिक उपभोगका लागि प्रयोग गरिने पानी नै यस्तो फोहोर र दुर्गन्धयुक्त भएपछि सर्वसाधारण प्रत्यक्ष रूपमा प्रभावित भएका छन्।
स्थानीयका अनुसार क्षेत्रमा नियमित रूपमा पानी आपूर्ति नहुने समस्या पुरानै हो। पानी कहिलेकाहीँ मात्र आउने र आएको बेला पनि शुद्ध नहुने समस्या दोहोरिँदै आएको छ। यस्तो पानी खान, पकाउन वा अन्य दैनिक प्रयोगका लागि पूर्ण रूपमा अनुपयुक्त रहेको उनीहरूको गुनासो छ।
फोहोर पानीका कारण स्वास्थ्यमा गम्भीर असर पर्ने जोखिम बढेको भन्दै अभिभावकहरू विशेष चिन्तित बनेका छन्। बालबालिका र वृद्धवृद्धामा रोग फैलिने डर समेत बढेको स्थानीयको भनाइ छ।
स्थानीयवासीले खानेपानी संस्थानको चरम लापरवाहीका कारण यस्तो अवस्था सिर्जना भएको आरोप लगाएका छन्। समयमै मर्मत, सरसफाइ र नियमित अनुगमन नगर्दा उपभोक्ताले स्वच्छ खानेपानी पाउनबाट वञ्चित हुनुपरेको उनीहरूको गुनासो छ।
सम्बन्धित निकायले यसतर्फ तुरुन्त ध्यान नदिए कडा आन्दोलनमा उत्रिने चेतावनी समेत स्थानीयले दिएका छन्। उनीहरूले स्वच्छ, सुरक्षित र नियमित खानेपानी उपलब्ध गराउन तत्काल प्रभावकारी कदम चाल्न माग गरेका छन्।
प्रतिक्रिया दिनुहोस्