‘एयरपोर्टको पार्किङ शुल्कले दिनभरीको आधा ज्याला खोस्यो’  

धनगढी । धनगढी विमानस्थललाई लक्षित गरेर यात्रु ओसारपोसार गर्ने यातायात व्यवसायी चर्को पार्किङ शुल्कका कारण तनावमा छन् । 

विगतमा पार्किङको प्रतिघण्टा अधिकतम २० रुपैयाँसम्म तिर्ने गरेको भए पनि अहिले उक्त शुल्क ह्वात्तै बढेर एक घण्टाकै ४० रुपैयाँ पुगेपछि यातायात व्यवसायी तनावमा परेका हुन् । 

उनीहरुले विमानस्थलमा पार्किङ शुल्क एक्कासी चौगुणा बढाइँदा दैनिक ज्यालाको आधा हिस्सा नै पार्किङ शुल्कमा जाने गरेको बताएका छन । 

‘सार्वजनिक यात्रु बोकेर कमाइ नै कति हुन्छ र ? त्यही दिनमा हजार पाँच सय बच्ने हो, त्यसैबाट आधा पैसा त पार्किङमा तिर्नुपर्छ’, एक यातायात व्यवसायीले भने, ‘कमाएको आधा ज्याला पार्किङमा तिर्नुपरेपछि के जोगाउने ? के ले खर्च टार्ने ?’ 

अर्कोतर्फ धनगढी विमानस्थलबाट टूरिष्ट गाडीले पनि सार्वजनिक यात्रु बोक्न थालेपछि थप मर्का परेको यातायात व्यवसायीहरुको गुनासो छ । ‘खासमा टूरिष्ट गाडीले टुरिष्ट मात्रै बोक्नुपर्ने हो’, एक यातायात व्यवसायीले भने, ‘तर यहाँ टुरिष्ट गाडीले पनि सार्वजनिक यात्रु बोक्न थालेका छन् । यसले गर्दा पनि हामी यातायात व्यवसायी थप मर्कामा परेका छौँ ।’ 

धनगढी विमानस्थलमा पार्किङको ठेक्का पाएको कुलेमष्ट कन्स्ट्रक्सनले भदौ १ गतेदेखि लागू हुनेगरि विमानस्थल पार्किङ शुल्क चौगुणासम्मले वृद्धि गरेको छ । कन्स्ट्रक्सनले सार्वजनिक गरेको नयाँ पार्किङ्ग शुल्क अनुसार अब विमानस्थलमा सवारी पार्किङ्ग गरेबापत मोटरसाइकल, स्कुटर र रिक्साले प्रतिघण्टा २० रूपैयाँ र प्रतिदिन १२० रूपैयाँ तिर्नुपर्नेछ भने कार, जिप, टेम्पो र  लिमोजिनले प्रतिघण्टा ४० र प्रतिदिन २४० रूपैयाँ तिर्नुपर्नेछ । 

त्यस्तै हल्का सवारीसाधन, मिनी बस र  माइक्रो बसले पार्किङ्गबापत प्रतिघण्टा ६० र प्रतिदिन ३६० रूपैयाँ तिर्नुपर्ने भएको छ भने बस र ट्रकले प्रतिघण्टा ९० र दिनको ५४० रूपैयाँ तिर्नुपर्नेछ । तर, एक महिना अघिसम्म न्युनतम १० रुपैयाँदेखि २० रुपैयाँ रहेको सेवा शुल्क ह्वात्तै बढाइँदा मर्का परेको यातायात व्यवसायीहरुले गुनासो पोखेका छन् । 

यता कन्स्ट्रसनका प्रतिनिधिले भने विमानस्थल सेवा शुल्क नियमावली २०७८ अनुसार नै शुल्क वृद्धि गरिएको दाबी गरेको छ । यद्यपि धनगढी विमानस्थलमा बढेको पार्किङ शुल्क नियमसंगत छ वा छैन भन्नेमै विमानस्थलका कर्मचारी पनि अनविज्ञ छन् ।