राप्रपाले काठमाडौं केन्द्रित जनसंघर्ष गर्न जिल्लाका नेतालाई केन्द्रमा झिकायो

धनगढी : राष्ट्रिय प्रजातन्त्र पार्टी राप्रपाले आगामी चैत १६ गते काठमाडौं केन्द्रित जनसंघर्ष गर्ने निर्णय गरेको छ।

पार्टीले फागुन ९ गते नेपाल सरकार समक्ष पेस गरेको ४० बुँदे माग पूरा गराउन देशका सबै जिल्लामा जनदबावका कार्यक्रम संचालन गर्ने र काठमाडौंमा जनसंघर्ष गर्ने निर्णय गरेको हो।

यसक्रममा राप्रपाले बुधबार राजधानीमा सबै जिल्लाको प्रतिनिधिमूलक आन्दोलन सम्बन्धि प्रशिक्षणसमेत गरेको छ। अध्यक्ष एवं आन्दोलन मूल समितिका संयोजक राजेन्द्र लिङ्देन, पूर्व अध्यक्ष एवं निर्देशन समितिका अध्यक्ष डा प्रकाशचन्द्र लोहनी र वरिष्ठ उपाध्यक्ष रवीन्द्र मिश्रले नीतिगत तथा आन्दोलनको अपरिहार्यताका विविध विषयमा, महामन्त्री एवं आन्दोलन परिचालन समितिका संयोजक डा धवल शमसेर राणाले संघर्षको कार्यक्रमको खाका, कोषाध्यक्ष, आर्थिक समिति संयोजक निलकण्ठ काफ्लेले अर्थ व्यवस्थापन र प्रवक्ता एवं आन्दोलन प्रचार समितिका संयोजक मोहन श्रेष्ठले आन्दोलनको प्रचार रणनीति विषयमा सहभागीहरुलाई प्रशिक्षण दिएका थिए।

राप्रपाले फागुन २३ गते जिल्ला तहमा तयारी बैठक र प्रशिक्षण, फागुन २८ गते संघीय र प्रदेशसभा निर्वाचन क्षेत्रमा, सबै स्थानीय तहमा तयारी बैठक, चैत ७ गतेसम्म सबै जिल्लामा प्रचारात्मक कार्यक्रम, घरदैलो, कोणसभा र साना ठूला सभा गर्ने भएको छ।

यसैगरी चैत १० गते देशका मुख्य शहरमा मोटरसाइकल ऱ्याली, चैत १४ गते पार्टी निकट राष्ट्रिय प्रजातान्त्रिक भुतपुर्व सैनिक संगठनले राष्ट्रिय झण्डा सहित राजधानीमा परेड प्रदर्शन गर्ने कार्यक्रम तय भएको छ।

राष्ट्रियता, विकास, सुशासन, सेवाप्रवाह एवं जनजीविकासंग सम्बन्धित तथा देशको दीर्घकालीन हितका विषयमा राप्रपाले सरकारलाई पेश गरेको ४० बॅुदे ज्ञापनपत्रका विषयमा देशव्यापी जागरण गर्दै चैत १६ गते काठमाडौंमा बृहत जनसंघर्ष गर्ने कार्यक्रम तय भएको छ।