धनगढी : नेदरल्यान्ड्सले ट्वान्टी-२० अन्तर्राष्ट्रिय त्रिकोणात्मक शृंखलामा नेपाललाई १ सय ८५ रनको लक्ष्य दिएको छ । नेपालले टस जितेपछि ब्याटिङको निम्तो पाएको नेदरल्यान्ड्सले त्रिवि क्रिकेट मैदान कीर्तिपुरमा ४ विकेट गुमाई १ सय ८४ रन बनाएको हो ।
म्याक्स ओ डडलाई तेस्रो ओभरमा करण केसीले ४ रनमै आउट गरे पनि अर्का ओपनर माइकल लेभिटले ५४ रन बनाए । ट्वान्टी-२० अन्तर्राष्ट्रियमा डेब्यु गरिरहेका लेभिटले ३६ बल खेली ५ चौका र ३ छक्का प्रहार गरे । कुशल मल्लको वाइड बलमा लेभिटलाई आसिफ शेखबाट स्टम्प आउट गराए ।
कप्तान स्कट इडवार्डस ३३ रनमा रनआउट भए । उनले १६ बल खेली ५ चौका प्रहार गरे । साइब्रान्ड इंगेलब्रेक्ट र तेजा निडामानुरुले चौथो विकेटमा ६१ रनको साझेदारी गरे । इंगेलब्रेक्टले अविजित ४९ रन बनाए । उनले ३८ बल खेली ४ चौका र १ छक्का प्रहार गरे । इनिङ्सको अन्तिम बलमा रनआउट भएका निडामानुरुले २४ बल खेली ३ चौकासहित ३१ रन बनाए ।
नेपालबाट दीपेन्द्रसिंह ऐरीले ४ ओभरमा १ मेडन राख्दै २० रनमात्र खर्चे । नेपाल पहिलो खेलमा नामिबियासँग २० रनले पराजित भएको थियो ।
प्रतिक्रिया दिनुहोस्