कञ्चनपुर: कञ्चनपुरमा बाघको आक्रमणबाट एक महिला घाइते भएकी छिन् । बाघको आक्रमणमा परी बेलौरी नगरपालिका– ९ कुण्डाकी २५ वर्षीया विन्दु डगौरा घाइते भएकी हुन् ।
बिहीबार सहकर्मीसँगै पटपुरा टिप्नका लागि गाउँदेखिको उत्तर जंगल गएकी डगौरालाई बाघले आक्रमण गरेको थियो । शुक्लाफाँटा राष्ट्रिय निकुञ्ज र राष्ट्रिय वनको सीमा क्षेत्रमा बाघले डगौरालाई आक्रमण गरेको स्थानीयले बताए ।
आठ–दशजना महिला सँगसँगै पटपुरा टिप्नका लागि जंगल गएको र एक्कासि उनलाई बाघले आक्रमण गरेपछि अन्य महिलाले होहल्ला गरेपछि बाघ भागेको थियो । ‘बाघले सुरुमै विन्दुलाई नै आक्रमण गरेको र ‘त्यसपछि अन्य महिलाले होहल्ला गरेपछि बाघ भाग्यो, उनीहरू घाइतेलाई लिएर घर आए ।’
विन्दुको स्थानीय बेलौरीकै अस्पतालमा उपचार हुन नसकेपछि धनगढी रिफर गरिएको छ । बाघको आक्रमणमा परेर विन्दुको आँखा र टाउकोमा चोट लागेको छ । अहिले धनगढीको नवजीवन अस्पतालमा उनको उपचार भइरहेको उनको परिवारका एक सदस्यले जानकारी दिए ।
प्रतिक्रिया दिनुहोस्